زیاتر لە 117 هەزار خوێندکار بەشدارى تاقیکردنەوە گشتییەکان دەکەن

ئەرشیف

تاقیکردنەوەى خوێندکاران

وەزارەتى پەروەردە رایگەیاند: لە هەرێمى کوردستان بۆ ئەمساڵ زیاتر لە 117 هەزار خوێندکار بەشداری لە تاقیکردنەوە گشتییەکانى قۆناغى 12ى ئامادەیى دەکەن.

وەزارەتى پەروەردەى حکومەتى هەرێمى کوردستان رایگەیاند: لە ئەمساڵدا زیاتر لە 117 هەزار خوێندکار بەشدارى لە تاقیکردنەوەکانى خولى یەکەمى قۆناغى 12ى ئامادەیى لە هەرێمى کوردستان دەکەن.

بەپێی ئاماری بڵاوکراوەى وەزارەتی پەروەردە، بۆ ئەمساڵی خوێندنى 2025-2026 کۆی گشتی 117 هەزار و 142 خوێندکار لە هەموو پارێزگا و ئیدارە سەربەخۆکانی هەرێمی کوردستان مافی بەشداریکردنیان هەیە و لەو ژمارەیەش 88 هەزار و 116 خوێندکار لە بەشی زانستی، 26 هەزار و 431 خوێندکار لە بەشی وێژەیی و دوو هەزار و 595 خوێندکاریش لە بەشی پیشەیین، کە تاقیکردنەوەکانیان بەسەر دوو هەزار و سێ هۆڵدا دابەشکراون.

لەسەر ئاستی پارێزگاکان، پارێزگاى هەولێر زۆرترین رێژەی بەشداربووی هەیە، کە رێژەکە بریتییە لە 38 هەزار و 63 خوێندکار، پاشان پارێزگاى دهۆک دێت کە 27 هەزار و 266 خوێندکار بەشدارى دەکەن و دواتر پارێزگای سلێمانی کە 26 هەزار و 563 خوێندکار و پارێزگای هەڵەبجەش هەزار و 590 خوێندکار بەشدارى لە تاقیکردنەوەکان دەکەن.

 سەبارەت بە ئیدارە سەربەخۆکانیش بە گوێرەى ئامارەکە، لە سۆران شەش هەزار و 398 خوێندکار، لە گەرمیان پێنج هەزار و 356 خوێندکار و لە راپەڕینیش چوار هەزار و 988 خوێندکار بەشداری لە تاقیکردنەوەکانی خولی یەکەمی قۆناغی 12ی ئامادەییدا دەکەن.

ئەمە لە کاتێکدایە، بڕیار وایە رۆژى 14ى6ى2026 یەکەمین تاقیکردنەوەى قۆناغى 12ى ئامادەیى لە هەرێمى کوردستان ئەنجامبدرێت.

PUKMEDIA