ناونووسین بۆ گەڕانەوەی ئاوارەکانی گرێ سپی و دەوروبەری دەستی پێکرد

روانگەی سوری بۆ مافەکانی مرۆڤ

گەڕاندنەوەی ئاوارەکان لەسوریا

رێکخراوی روانگەی سووری بۆ مافەکانی مرۆڤ ڕایگەیاند: بەڕێوەبەرایەتیی خۆسەر دەرگای ناونووسینی بۆ ئەو هاووڵاتیانە کردووەتەوە، کە بەهۆی شەڕ و ئاڵۆزییەکانەوە لە شارۆچکەی گرێ سپی و گوندەکانی دەورووبەری کۆچبەر بوون، ئەمەش وەک ئامادەکارییەک بۆ گەڕاندنەوەیان بۆ سەر ماڵ و حاڵی خۆیان لە چوارچێوەی کاروانێکی رێکخراو و ئارامدا.

بەپێی زانیارییەکانی روانگەی سووری، پرۆسەکە لەڕێگەی نووسینگەکانی دەستەی جێبەجێکاری سەر بە بەڕێوەبەرایەتیی خۆسەر لە هەردوو شاری قامیشلو و کۆبانێ بەڕێوەدەچێت و دانیشتوانی شاری گرێ سپی و نزیکەی 30 گوندی دەوروبەری رۆژئاوای شارەکە دەگرێتەوە، لەنێویاندا ئاوارە کوردەکانی ناوچەکانی گرێ سپی، رەقە و تەبقا، بڕیاریشە کۆچبەران بەپێی چەند قۆناغێک بگەڕێندرێنەوە.

هاوکات دوای تەواوبوونی ڕێکارە پێویستەکان و هەماهەنگی لەگەڵ لایەنە پەیوەندیدارەکان بە مەبەستی پاراستنی ماف و موڵک و ماڵیان، لە چوارچێوەی پرۆگرامی گەڕانەوەی ئارەزوومەندانەدا، هاوکاریی دارایی پێشکەش بەو خێزانانە دەکرێت کە ناوی خۆیان تۆمار دەکەن بۆ ئەوەی هانبدرێن بگەڕێنەوە سەر زێدی خۆیان.

ئەم هەنگاوە دوای نزیكەی شەش ساڵ لە دەربەدەری و ناڵاندنی هەزاران خێزانی ئەو ناوچەیە دێت، کە کۆچبەربوونی بەکۆمەڵیان دەگەڕێتەوە بۆ تشرینی یەکەمی ساڵی 2019.

PUKMEDIA