ئەنجومەنی وەزیران کۆبوونەوەی ئاسایی خۆی دەکات

راگەیاندنى حکومەتى هەرێم

وێنەى کۆبوونەوەیەکى پێشترى ئەنجومەنى وەزیران

ئەمڕۆ چوارشەممە 17ی حوزەیرانی 2026، ئەنجومەنی وەزیران بە ئامادەبوونی سەرۆک و جێگری سەرۆکوەزیرانى حکومەتى هەرێمى کوردستان کۆدەبێتەوە.

بە پێى راگەیەندراوێکى حکومەتى هەرێمى کوردستان، لە کۆبوونەوەکەدا تاووتوێی سێ بڕگە دەکرێت:  لە بڕگەی یەکەمدا، بابەتی وەرگرتنەوەی بەرهەمی گەنمی جووتیارانی هەرێمی کوردستان، بۆ وەرزی چاندنی ئەمساڵ لەلایەن حکومەتی فیدراڵەوە لە چوارچێوەی پلانی ساڵانە و گرفت و چارەسەرەکان، گفتوگۆ دەکرێت.

ئاماژە بەوەشدراوە: لە بڕگەی دووەمدا، بابەتی بڕیاردان لەسەر بابەتی خانەنشینکردنی ئەندامانی ئەنجومەنی پارێزگاکانی هەرێمی کوردستان، ئەوانەی کە مەرجی یاسایی تەمەن و ساڵانی خزمەتی خانەنشینییان هەبووە، دەخرێتەڕوو.

ئەوەش خراوەتەڕوو: لە بڕگەی سێیەمدا، بابەتی راگرتنی سوودمەندیی خاوەن داهاتە باڵاکان لە پڕۆژەی سەبەتەی خۆراکیی ناوەندی، کە لە لایەن وەزارەتی بازرگانیی فیدراڵی لە خەرجییە حاکیمەکان پارەی بۆ تەرخان دەکرێت و تایبەتکردنی بە خاوەن داهاتە سنووردارەکان، گفتوگۆ دەکرێت.

PUKMEDIA