رێککەوتنی کاتیی ئەمریکا و ئێران نرخی نەوتی دابەزاند

PUKMEDIA

نرخی نەوت لە جیهان

ئەمڕۆ پێنجشەممە، نرخی نەوت بە ڕێژەی زیاتر لە دۆلارێک بۆ هەر بەرمیلێک دابەزی و ئەمەش دوای ئەوە هات کە ویلایەتە یەکگرتووەکانی ئەمریکا و ئێران ڕێککەوتنێکی کاتییان ئیمزا کرد بە ئامانجی کۆتاییهێنان بە شەڕی نێوانیان و دووبارە کردنەوەی جوڵەی بازرگانی گەرووی هورمز، لەگەڵ لادانی سزاکانی ئەمریکا لەسەر هەناردەی نەوتی ئێران، ئەمەش بووە هۆی بەهێزکردنی پێشبینییەکان بۆ زیادبوونی خستنەڕووی جیهانیی نەوتی خاو.

نرخی گرێبەستی نەوتی خاوی برێنت بە بڕی 1.64 دۆلار (یان بە ڕێژەی 2.06%) دابەزی و گەیشتە 77.91 دۆلار بۆ هەر بەرمیلێک، هەروەها گرێبەستی دواخراوەکانی نەوتی خاوی ڕۆژئاوای تەکساس (WTI) بە بڕی 1.80 دۆلار (یان بە ڕێژەی 2.34%) دابەزی و گەیشتە 74.99 دۆلار بۆ هەر بەرمیلێک.

ئەم پاشەکشەیەی نرخەکان تەنها یەک ڕۆژ دوای بەرزبوونەوەی پێشوویان هات، کاتێک بازاڕەکان سەرلەنوێ سەرنجیان خستەوە سەر لێکەوتەکانی ڕێککەوتنی ئەمریکا-ئێران و کاریگەرییەکانی لەسەر دابینکردنی وزە لەسەر ئاستی جیهان.

PUKMEDIA