لەفێستیڤاڵی فیلمی مۆبایلدا 15 فیلم كێبڕكێ دەكەن

راگەیاندنی فێستیڤاڵی فیلمی كوردیی مۆبایل

خولی دووەمی فێستیڤاڵی فیلمی كوردیی مۆبایل

دامەزراوەی ڤیم بەسپۆنسەری میدیایی دەزگای میدیایی كوردسات، خولی دووەمی فێستیڤاڵی فیلمی كوردیی مۆبایل لەسلێمانی بەڕێوەدەبات، وتەبێژی فێستیڤاڵەكەش دەڵێت: 15 كورتەفیلمی جیاواز لەسەر شاشەی فێستیڤاڵەوە نمایش دەكرێن كە سەرجەمیان بە مۆبایل بەرهەمهێنراون و ئامانجیشمان رەخساندنی دەرفەتە بۆ گەنجان تاوەكو بەكەمترین تێچوو، لەڕێگەی مۆبایلەكانیانەوە بەرهەمە هونەرییەكانیان بخەنەڕوو.

شادمان محەمەد، وتەبێژی فێستیڤاڵی فیلمی كوردیی مۆبایل، بەوێبسایتی رەسمی یەكێتیی نیشتمانیی كوردستان PUKMEDIA ی راگەیاند: سەعات 6:30 دەقیقەی ئێوارەی ئەمڕۆ هەینی 19ی 6ی 2026، دامەزراوەی ڤیم بەسپۆنسەری میدیایی دەزگای میدیایی كوردسات، خولی دووەمی فێستیڤاڵی فیلمی كوردیی مۆبایل لە سیتی سینەما لەسلێمانی بەڕێوەدەبات و ماوەی دوو رۆژ بەردەوام دەبێت.

راشیگەیاند: لەخولی دووەمی فێستیڤاڵی فیلمی كوردیی مۆبایل-دا 15 كورتەفیلمی جیاواز لەسەر شاشەی فێستیڤاڵەوە نمایش دەكرێن كە سەرجەمیان بە مۆبایل بەرهەمهێنراون و ئامانجی سەرەكیشمان رەخساندنی دەرفەتە بۆ گەنجان و لاوان تاوەكو بەكەمترین تێچوو، لەڕێگەی مۆبایلەكانیانەوە بەرهەمە هونەرییەكانیان بخەنەڕوو.

وتەبێژی فێستیڤاڵی فیلمی كوردیی مۆبایل ئەوەشی خستەڕوو: لەم خولەدا 11 خەڵاتی جیاواز بۆ بوارەكانی (باشترین فیلم، دەرهێنان، سیناریۆ، ئەكتەران، مۆنتاژ، میوزیك و چەند بوارێكی دیكە) تەرخانكراوە، كە گرنگترینیان خەڵاتی ڤیم میدیایە؛ ئەم خەڵاتە بریتییە لەگرتنەئەستۆی تەواوی تێچووی بەرهەمهێنانی فیلمی داهاتووی براوەكە لەلایەن دامەزراوەی ڤیمەوە، بە مەبەستی پەرەپێدانی توانای بەهرەمەندان و دەوڵەمەندكردنی رەوتی سینەمای كوردی.

ئاماژەی بەوەشكرد: فیلمەكان لەسەر چەندین پێوەر بۆ بەشداری لەفێستیڤاڵەكەدا هەڵبژێردراون و مەرجی سەرەكیش ئەوەبووە كە فیلمەكە كوردی بێت، بۆ ئەوەی بتوانین لەڕێگەی فیلمەوە وەك نەتەوەی كورد زیاتر خۆمان بەوڵاتانی ديكە بناسێنین، جگە لەوەی چیرۆك و ناوەڕۆكی فیلمەكان بەجۆرێك هەڵبژێردراون كە باسی چەند بابەتێكی ناو كۆمەڵگەی كوردی دەكەن.

شادمان محەمەد راشیگەیاند: لە هەڵسەنگاندنەكاندا رەچاوی ئەوەكراوە كەفیلمەكان بە مۆبایل بەرهەمێنراون و فیلمی درێژ نین، هاوكات ئامانجی سەرەكی فێستیڤاڵەكەش دەستگرتنی ئەو فیلمسازانەیە كە رەنگە بە كۆمەڵێك هۆكار نەیانتوانیبێت تواناكانی خۆیان پیشان بدەن و دەمانەوێت ئەو پەیامەش بگەیەنین دەتوانرێت بە مۆبایل بەرهەمهێنانی باش بكرێت.

ئەمەش لەكاتێكدایە، رۆژی 5ی 5ی 2025، خولی یەكەمی فێستیڤاڵی فیلمی كوردیی مۆبایل لەلایەن بەشی هونەری سینەمایی بەڕێوەبەرایەتی گشتیی رۆشنبیری و هونەری پارێزگای سلێمانی، بەهاوبەشیی دامەزراوەی ڤیم بەڕێوەچوو، لەڕۆژی یەكەمدا 13 فیلم و لەڕۆژی دووەمدا 12 فیلم نمایش كران، لە كۆی 100 فیلم كە تایبەت بە فێستیڤاڵەكە دروستكرابوون و بە فلتەری هەردوو لیژنەی هەڵبژاردنی فیلمەكان و لیژنەی دادوەراندا تێپەڕین، 25 فیلم بۆ بەشداریكردن هەڵبژێردران و بۆ بردنەوەی 10 خەڵات كێبڕكێیان دەكرد.

PUKMEDIA