دەزگای مین سزای ئەوکەسانە دەدات ڤیدیۆی مین بڵاودەکەنەوە

راگەیاندنی دەزگای مین

مین

لە راگەیەندراوێکدا دەزگای مین هۆشداریی توند دەداتە ئەو کەسانەی دەستکاری تەقەمەنی دەکەن و ڤیدیۆ بڵاودەکەنەوە و رایدەگەیەنێت: هەر هاووڵاتییەک لە ناوچە مەترسیدارەکاندا دەستکاری مین و تەقەمەنی بکات، یان بە مەبەستی ناوبانگ و سۆشیاڵ میدیا ڤیدیۆی ئەو جۆرە کارە مەترسیدارانە بڵاوبکاتەوە، رووبەڕوی لێپێچینەوەی توندی یاسایی دەبێتەوە.

دەقی راگەیەندراوەکە:

لەدوای زیادبوونی حاڵەتەکانی دەستکاریکردنی مین و پاشماوە جەنگییەکان لە لایەن هەندێک هاووڵاتییەوە، بەبێ رەچاوکردنی رێنماییەکانی دەزگای مین و یاسا بەرکارەکانی حکومەتی هەرێم ، دەزگای گشتیی کاروباری مین هۆشدارییەکی بەپەلە و توند ئاڕاستەی سەرجەم گروپەکانی شاخەوانی و ئەو هاووڵاتیانە دەکات کە دەستکاری مین و پاشماوە جەنگییەکان لە ناوچە مەترسیدارەکاندا دەکەن.

بەشێک لە هاووڵاتیان بەبێ گوێدانە مەترسییەکان، نزیکی ئەو ناوچانە دەبنەوە کە نیشانەی ئاگادارکەرەوەیان لێدراوە، یان دەستکاری ئەو مین و پاشماوە نەتەقیوانە دەکەن کە لە ناوچە شاخاوییەکاندا دەیدۆزنەوە، ئەم رەفتارانە نەک تەنها مەترسییەکی گەورە بۆ سەر ژیانی خودی کەسەکە و دەوروبەری دروست دەکات، بەڵکو دەچێتە چوارچێوەی سەرپێچیی یاساییەوە.

بەم دیاردەیە، جەبار مستەفا، سەرۆکی دەزگای گشتیی کاروباری مین رایگەیاند:"هەر هاووڵاتییەک لە ناوچە مەترسیدارەکاندا دەستکاری مین و تەقەمەنی بکات، یان بە مەبەستی ناوبانگ و سۆشیاڵ میدیا ڤیدیۆی ئەو جۆرە کارە مەترسیدارانە بڵاوبکاتەوە، رووبەڕوی لێپێچینەوەی توندی یاسایی دەبێتەوە."

ناوبراو جەختی کردەوە کە ئەم جۆرە ڤیدیۆیانە هاندەرن بۆ کاری هەڵە و هاندانی هاووڵاتیانی تر بۆ نزیکبوونەوە لەو ناوچانە، هەر بۆیە دەزگاکەمان لەڕێگەی لایەنە پەیوەندیدارەکانەوە بەدواداچوون بۆ ئەو کەسانە دەکات، کە سەرپێچیی ڕێنماییەکان دەکەن.

لە کاتی بینینی مین و تەقەمەنی، دەزگای گشتیی کاروباری مین چەند رێنماییەکی گرنگی بۆ هاووڵاتیان هەیە لەوانە:

1-دەستکاری مەکە: هەر جۆرە تەنێکی گوماناوی یان پارچە ئاسنێکت بینی، بە هیچ جۆرێک دەستی لێ مەدە و مەیجوڵێنە.

2-وێنە و ڤیدیۆ مەگرە: نزیکبوونەوە لە مین بۆ مەبەستی وێنەگرتن یان پیشاندان، یارییکردنە بە ژیانی خۆت، ژینگە و دەوروبەرت.

3-پەیوەندی بکە: لە کاتی بینینی هەر مەترسییەک، تەنها پەیوەندی بە هێڵی گەرمی خۆڕایی ژمارە 182بکە.

دەزگای گشتیی کاروباری مین دووپاتی دەکاتەوە کە ئەرکی ئەوان پاراستنی گیانی هاووڵاتیانە، بەڵام هاوکاریی هاووڵاتیان و پابەندبوونیان بە یاسا و ڕێنماییەکان، مەرجی سەرەکییە بۆ کەمکردنەوەی قوربانیانی مین لە هەرێمی کوردستاندا.

PUKMEDIA