شەشەمین کۆنگرەی كۆمەڵەی ئەكادیمیانی كوردستان لە سلێمانى بەڕێوەچوو

تایبەت

وێنەیەکى کۆنگرەکە

ئەمڕۆ كۆمەڵەی ئەكادیمیانی كوردستان لە سلێمانى شەشەمین کۆنگرەیان خۆیان بەست و بە گوڕوتینێكی زانستییەوە درێژە بە ئەركەكانیان دەدەن لە پێناو پێشخستنی پرۆسەی خوێندن لە هەرێمی كوردستان و 15 ئەكادیمیست وەك ئەندامی نوێی دەستەی كارگێڕی كۆمەڵەكە هەڵبژێردران، کە سەرجەمیان لەسەر لیستی یەكێتیی نیشتمانیی كوردستانن. 

ئەمڕۆ پێنجشەممە 25ى6ى2026 لە شاری سلێمانی شەشەمین كۆنگرەی كۆمەڵەی ئەكادیمیانی كوردستان بەڕێوەچوو، ئەمەش لە کاتێکدایە كۆمەڵەی ئەكادیمیانی كوردستان لە نیسانی 2013دا كۆتا كۆنگرەی خۆی ئەنجامدابوو، كە چەندین ساڵە شەرعیەتی هەلبژاردنی نەمابوو، ئەمڕۆ پەیڕەوی نوێی كۆمەڵەكە پەسەندكرا بە تێكڕای دەنگی ئەندامانی كۆنگر و لە كۆی 421 ئەندام كۆنگرە 346 ئەندام كۆنگرە ئامادەبوون و نیسابی یاسایی كۆنگرە تەواوبوو.

لە ئەنجامى کۆنگرەى ئەمڕۆدا 15 ئەكادیمیست وەك ئەندامی نوێی دەستەی كارگێڕی كۆمەڵەكە هەڵبژێردران، سەرجەمیان لەسەر لیستی یەكێتیی نیشتمانیی كوردستانن و لەو 15 ئەندام دەستەی كارگێڕییە 4 ژنی تیایە و جگە لە موسڵمان نوێنەری پێكهاتەی ئاینی و مەزهەبی جیاواز لەخۆدەگرێت، كە گوزارشت لە فرەڕەنگی هەرێمی كوردستان دەكات و نوێنەرە سەركەوتووەكان نوێنەرایەتی شارەكانی سلێمانی، هەولێر، دهۆك، هەلەبجە، كەركوك، چەمچەماڵ، دەڤەری راپەڕین، كۆیە، بەغداد دەكات و جگە لە نەتەوەی كورد لە دەستەی كارگێڕیدا توركمان وەك پێكهاتەی نەتەوەیی دیکە و فەیلی وەك پێكهاتەی مەزهەبی دیکە و كاكەییش لەخۆدەگرێت.

هاوکات بارەگای سەرەكی كۆمەڵە لە سلێمانی دەبێت و لەماوەی پانزە رۆژدا پێویستە ئەم دەستە نوێیە لەو 15 ئەكادیمیستە لەناو خۆیاندا هەڵبژاردن ئەنجام بدەن بۆ: ( سەرۆكی كۆمەڵە - جێگری سەرۆكی كۆمەڵە - بڕیاردەری كۆمەڵە).

ئەم كۆمەڵەیە لە تەموزی 1995 لە شاری هەولێر لەسەر دەستی كۆمەڵێك ئەكادیمیست دامەزراوە بە سەرۆكایەتی خوالێخۆشبوو پ.د. كەمال خۆشناو و رێكخراوێكی ئەكادیمی، زانستی، رۆشنبیری، پیشەییە، تایبەتە بە هەڵگرانی بڕوانامەی ماستەر و دكتۆرا لە زانكۆكان و دەرەوەی زانكۆكان.

PUKMEDIA