وه‌زاره‌تی دارایی: ده‌رماڵه‌ی نوێ خه‌رج ناكرێت

راگەیاندنى وەزارەت

بیناى وەزارەتى دارایى

وەزارەتى دارایى حکومەتى هەرێمى کوردستان روونکردنەوەیەک تایبەت بە دەرماڵەى پایە بڵاودەکاتەوە و ئاڕاستەى سەرجەم وەزارەت و فەرمانگەکان دەکات و ئاماژە بە ئەوە دەکات: ئەگەر هەر پۆستێک لە بنەڕەت و پەیکەرى رێکخستنى فەرمانگەکەدا هەبووبێت، ئەو کەسەى ئەو پۆستە وەردەگرێت دەرماڵەى پایەى بۆ خەرج دەکرێت، هەروەها هەر فەرمانبەرێک لە شوێنى فەرمانبەرێکى دیکە لەو پۆستەدا دەستبەکاربێت بەهەمان شێوە دەرماڵەى پایەى بۆ خەرج دەکرێت.

هەر بە پێى روونکردنەوەکەى وەزارەتى دارایى پێکهاتە و پۆستە نوێیەکان لە وەزارەت و فەرمانگەکان بەڕێوەبەرەکانیان دەرماڵەى پایەیان بۆ خەرج ناکرێت، واتا هەر بەڕێوەبەرایەتییەک، بەش و هۆبەیەک لە پێکهاتەى نوێى وەزارەت و فەرمانگەکاندا بێت رەزامەندى دەرچوونى لە دواى مانگى سێى ساڵى 2025ەوە درابێت ئەوا دەرماڵەى پایەى بۆ خەرج ناکرێت.

بەپێى روونکردنەوەکەى وەزارەتى دارایى بێت هیچ پایەیەکى نوێ دەرماڵەى بۆ خەرج ناکرێت، هاوکات مافپەروەر کامۆ خدر رایگەیاندووە: نەبەستنى دەرماڵەى پایەى نوێ تەواو پێچەوانەى یاسا و رێنماییەکانە و پێویستە ئەو دەرماڵە نوێیانە خەرج بکرێن.



PUKMEDIA