گەشتوگوزاری هەڵەبجە پێشبینی هاتنی ملیۆنێک گەشتیار دەکات

PUKMEDIA

چیا قاسم، بەڕێوەبەری گەشتوگوزاری هەڵەبجە

بەڕێوەبەری گەشتوگوزاری هەڵەبجە رایدەگەیەنێت: پێشبینی دەكەین تا كۆتایی ئەمساڵ، نزیكەی ملیۆنێك گەشتیار روو لەپارێزگاكە بكەن، بۆ ئەم مەبەستەش زیاتر لە 250 بنكەو شوێنی گەشتیارییمان بۆ پێشوازیكردن لەگەشتیاران ئامادە كردووە.

چیا قاسم، بەڕێوەبەری گەشتوگوزاری هەڵەبجە، بەوێبسایتی رەسمی یەكێتیی نیشتمانیی كوردستان PUKMEDIA ی راگەیاند: زیاتر لە 250 كافتریا، چێشتخانە، كەپرو كوخی گەشتیاری، هۆتێل و شوێنی مانەوە ئامادەكراون بۆ پێشوازیكردن لەگەشتیاران لەوەرزە جیاوازەكاندا، بۆیە پێشبینی دەكەین، تاكۆتایی ساڵی 2026، نزیكەی ملیۆنێك گەشتیار روو لەهەڵەبجە بكەن.

راشیگەیاند: پارێزگای هەڵەبجە لەماوەی ساڵی رابردوودا، پێشوازی لەزیاتر لەملیۆنێك و 17 هەزار گەشتیار كرد، لەو ژمارەیەش نیو ملیۆنیان روویان لەفێستیڤاڵی هەنار كرد، بۆیە پێشبینیی دەكەین پارێزگاكە لەمساڵدا ژمارەیەكی پێوانەیی لەهاتنی گەشتیاران تۆمار بكات.

چیا قاسم ئاماژەی بەوەشكرد: بەهۆی سەقامگیری ئاسایشی ناوچەكەو كۆتاییهاتنی جەنگی نێوان ئەمریكاو ئێران، چاوەڕوان دەكرێت كەرتی گەشتوگوزار لەپارێزگای هەڵەبجە لەساڵی 2026دا گەشەسەندنێكی بەرچاو بەخۆیەوە ببینێت.

جێی ئاماژەیە، لەكۆتایی تشرینی یەكەمی ساڵی 2025، فێستیڤاڵی هەنارو پایزی هەڵەبجە بەڕێوەچوو، نیو ملیۆن گەشتیار سەردانیان كردو قەبارەی فرۆشتنیش گەیشتە نزیكەی ملیارێك و 700 ملیۆن دینار.

PUKMEDIA