پۆلیسی سلێمانی باخەوانێکی تۆمەتبار بە دزینی پارە دەستگیر دەکات

راگەیاندنی پۆلیسی سلێمانی

لۆگۆی پۆلیسی سلێمانی

پۆلیسی سلێمانی دەستگیرکردنی تۆمەتبارێکی راگەیاند، کە وەک باخەوان کاری کردووە و بڕی 16 هەزار و 500 دۆلاری ئەمریکی و ملیۆنێک دیناری عیراقی لەناو باخێکدا دزیبوو.

راگەیاندنی بەڕێوەبەرایەتی پۆلیسی پارێزگای سلێمانی رایگەیاند: مەفرەزەکانی نوسینگەی نەهێشتنی تاوانی سیتەک تۆمەتبارێکیان دەستگیرکرد کە بڕێک پارەی لەناو باخێکدا لەسیتەک دزیبوو.

روونی کردەوە: دوای ئەوەی هاووڵاتیەک لەنوسینگەی نەهێشتنی تاوانی سیتەکی سەر بەبەشی نەهێشتنی تاوانی بەڕێوەبەرایەتیمان سکاڵای تۆمارکرد کە بڕێک پارەی لێدزراوە، پاش وەرگرتنی بڕیاری بەڕێز دادوەر و دوای لێکۆڵینەوە و بەدواداچونەکان و کۆکردنەوەی زانیاری، توانرا لەکەمترین کاتدا و لەلایەن مەفرەزەکانی نوسینگەی نەهێشتنی تاوانی سیتەکەوە تۆمەتبار بدۆزرێتەوە و دەستگیربکرێت کە بڕی 16هەزار و 500 دۆلاری ئەمریکی و یەک ملیۆن دیناری عیراقی دزیبوو.

ئاماژەی بە ئەوەشدا: لەئێستادا تۆمەتبار (س، ع، ح ) لەدایکبووی 1990 کە باخەوانی سکاڵاکاربووە بەپێی ماددەی (444) لە یاسای سزادانی عیراقی راگیراوە و لێکۆڵینەوە لەگەڵیدا بەردەوامە.

PUKMEDIA