ڕۆژنامه‌نووسانی وه‌رزشی كوردستان: بێژەرە وەرزشییەکان بەبەرپرسیارییەوە مامەڵە لەگەڵ پیشەکەیان بکەن

لقی سلێمانی سەندیکای رۆژنامەنوسان

‌لێژنه‌ی ڕۆژنامه‌نووسانی وه‌رزشی كوردستان

هەندێک لە بێژە وەرزشییەکان لە کاتی بەخشی ڕاستەوخۆی بەرنامە و پێشبڕکێ وەرزشییەکانی تایبه‌ت به‌جامی جیهانی، هەڵسوکەوت و وشەی نەگونجاو بەکار دەهێنن ، ‌لێژنه‌ی ڕۆژنامه‌نووسانی وه‌رزشی كوردستانیش دووپاتی دەکاتەوە، پێویستە هەموو کارمەندانی ئەو بوارە پابەندی بن بە بنەماکانی ئەخلاقی پیشەیی، ڕێزگرتن لە بینەر و پاراستنی زمانی گونجاو.

‌لێژنه‌ی ڕۆژنامه‌نووسانی وه‌رزشی كوردستان، لە به‌یاننامه‌یەکدا رایگەیاند: لە لێژنه‌كه‌مان ناره‌زایی قووڵی خۆمان دەردەبڕین سەبارەت بە هەڵسوکەوت و بەکارهێنانی وشە و دەربڕینە نالەبارەکانی هەندێک لە بێژە وەرزشییەکان لە کاتی بەخشی ڕاستەوخۆی بەرنامە و پێشبڕکێ وەرزشییەکانی تایبه‌ت به‌جامی جیهانی 2026.

دەشڵێت: لای هه‌مووان ڕوون وئاشكرایه‌ میدیای وەرزشی پەیامێکی گرنگی کۆمەڵایەتی هەیە و پێویستە هەموو کارمەندانی ئەو بوارە پابەندی بن بە بنەماکانی ئەخلاقی پیشەیی، ڕێزگرتن لە بینەر و پاراستنی زمانی گونجاو،هەرجۆرە هەڵسوکەوتێکی ناپەسەند لە پەخشی ڕاستەوخۆ و ناڕاسته‌وخۆ، کاریگەریی نەرێنی لەسەر کۆمەڵگا، بە تایبەتی وه‌رزشوانان و چینی لاوان و منداڵان جێدەهێڵێت.

‌لێژنه‌ی ڕۆژنامه‌نووسانی وه‌رزشی كوردستان، لە راگەیەندراوەکەیاندا، داواکارن ئه‌م دیارده‌یه‌ ده‌ست به‌جێ ڕابگرێت و ڕێنمایی و چاودێریی پێویست بەکاربهێندرێت و هەنگاوی یاسایی و ئیداریی گونجاو بگرنەبەر بۆ ڕێگرتن لە دووبارەبوونەوەی ئەم جۆرە هەڵسوکەوتانە.

لە کۆتایشدا دووپاتی دەکەنەوە، کە پێویسته‌ بێژە وەرزشییەکان و پێشکەشکاران بە بەرپرسیارییەوە مامەڵە لەگەڵ ئەرکی خۆیان بکەن و هەمیشە وێنەیەکی شایستە لە پیشەکەیان و میدیای وڵات پێشکەش بکەن.
باوەڕمان وایە پاراستنی ئەخلاقی میدیا و بەرزڕاگرتنی ئاستی گوتار و هەڵسوکەوت، هەنگاوێکی گرنگە بۆ بەهێزکردنی متمانەی جەماوەر بە دامەزراوە میدیاییەکان.


PUKMEDIA