سلێمانی.. پرۆسەیەکی ئاڵۆزی چاندنی مۆخی ئێسک سەرکەوتوو دەبێت

PUKMEDIA

د. یاد نەقشبەندی، بەڕێوەبەری نەخۆشخانەی هیوا

بۆ یەکەم جار لەسەر ئاستی هەرێم و عیراق پرۆسەیەکی ئاڵۆزی چاندنی مۆخی ئێسک لە سلێمانی ئەنجام دەدرێت و نەخۆشەکە بەسەلامەتی دەگەڕێتەوە ناو خێزانەکەی.

د. یاد نەقشبەندی، بەڕێوەبەری نەخۆشخانەی هیوا لە کۆنگرەیەکی رۆژنامەوانیدا رایگەیاند: بەسەرکەوتووی پرۆسەیەکی ئاڵۆزی چاندنی مۆخی ئێسکمان بۆ خاتونێک ئەنجامدا کەیەکەم جارە لەسەر ئاستی عیراق و هەرێم ئەنجام دەدرێت و پاش مانگێکیش لە نەشتەرگەرییەکە گەڕایەوە ناو خێزانەکەی.

د. یاد ئاماژەی بەوە کرد: نەشتەرگەرییەکی لەم شێوەیە ئەگەر حکومەت بینێرێتە دەرەوەی وڵات نزیکەی 140 هەزار دۆلار دەکەوێت، بەڵام ئێمە لەم نەخۆشخانەیە سەرجەم چارەسەر و رێکارە مادییەکان لەسەر داهاتی سلێمانی جێبەجێ دەکەین و بەداخەوە حکومەتی هەرێم و عیراقیش گرنگیمان پێنادەن و بودجەمان بۆ دابین ناکەن.

ئاماژەی بەوەشکرد: تا ئێستا 523 حاڵەتی چاندنی مۆخ لەم نەخۆشخانەیە ئەنجامدراوە و سەرجەم پرۆسەکان لەسەر داهاتی سلێمانی بووە، کەئەگەر سلێمانی لەقەیراندا بێت کاری ئێمەش دەوەستێت، کە 40٪ ی ئەو نەشتەرگەرییانە بۆ خەڵکی سلێمانی و هەڵەبجە و گەرمیان و راپەڕین بووە، 60٪ی بۆ شارەکانی تری هەرێم و عیراق بووە.

لەلایەکی ترەوە ئاماژەی بەوە کرد کە 40٪ی کارمەندەکانمان خۆبەخشن و ئیدارەی گشتی و نوسینگەی قوباد تاڵەبانی پشتیوانی ئەو کارمەندانەن و هاوکارییان بۆ دابین دەکەن.

PUKMEDIA