وەزارەتی بازرگانی کۆتاییهاتنی وەرزی بەبازاڕکردنی گەنمی راگەیاند

واع

وەرگرتنی گەنمی جوتیاران کۆتایی هات

وەزیری بازرگانی عیراق ، کۆتایی هاتنی  وەرزی بەبازاڕکردنی بەرھەمی گەنمی ساڵی 2026 راگەیاند و دەشڵێت: کۆی گشتیی ئەو بڕە گەنمەی لە جووتیاران وەرگیراوە گەیشتووەتە نزیکەی پێنج ملیۆن تۆن.

 مستەفا نزار عانی وەزیری بازرگانی عیراق، رایگەیاند: وەرزی بەبازاڕکردنی گەنمی جوتیاران بۆ ئەمساڵ کۆتایی هاتووە و ئەو بڕەی وەرگیراوە، گەیشتووەتە چوار ملیۆن و 800 هەزار تۆن.

ئاماژەی بەوەشکرد: ئەو بڕە گەنمەی وەرنەگیراوە، جا لەناو پلانی کشتوکاڵیدا بێت یان لەدەرەوەی پلانەکە ڕێگەی پێدەدرێت کە لەنێوان پارێزگاکاندا بگوازرێتەوە و لە بازاڕە ناوخۆییەکاندا مامەڵەی پێوە بكرێت.

لە بارەی شایستەی دارایی جوتیارانیش، وەزیری بازرگانی عیراق، ئاشکرای کرد: وەزارەتەکەیان بەردەوامە لە بەدواداچوون بۆ ڕێکارەکانی خەرجکردنی پارەی جووتیاران و لە ڕۆژانی داهاتوودا گوژمەیەکی نوێ لە شایستە داراییەکانی جووتیاران دابەش دەکرێت، ئەمەش پابەندبوونێکی وەزارەتەکەیە بەرامبەر بە مافی جووتیاران و ئامانجیش لەمە بۆ پشتیوانیکردنی جوتیارانە.

لە کۆتایشدا، مستەفا نزار عانی وەزیری بازرگانی عیراق ، دووپاتی کردەوە: ئاسایشی خۆراک لە بەرهەمی گەنمدا، تاوەکو دەستپێکردنی وەرزی داهاتوو بە تەواوی گرەنتى کراوە.

PUKMEDIA