هەناردەى نەوتى عیراق بە ڕێژەى 85% دابەزیوە

AI- PUKMEDIA

كاریگەری داخستنی گەروی هورمز لەسەر عیراق

ڕاپۆرتێکى نێودەوڵەتى هاوبەش ئاشکرای دەکات، بەهۆى داخستنى گەرووى هورمز هەناردەى نەوتى عیراق بە ڕێژەى 85% دابەزیوە و قەرزى ناوخۆییش 100 تریلیۆن دینارى تێپەڕاندووە، ئەمەش وایکردووە زۆرێک لە خێزانەکان پەنا بۆ ستراتیجى خۆگونجاندن ببەن.


ڕێکخراوى خۆراک و کشتوکاڵ (فاو)، بانکى نێودەوڵەتى و پرۆگرامى خۆراکى جیهانى (دەبلیو، ئێف، پى)، ڕاپۆرتێکى هاوبەشیان لەبارەى لێکەوتە ئابوورى، دارایی و خۆراکییەکانى داخستنى گەرووى هورمز لەسەر عیراق بڵاوکردووەتەوە و ئاماژەیان بەوەکردووە: داخستنى گەرووى هورمز بووەتە هۆى دابەزینى داهاتى نانەوتى عیراق لە 6.7 ملیار دۆلار لە شوباتى 2026 بۆ نزیکەى ملیارێک دۆلار لە ئایارى 2026، واتە بەرێژەى 85% داهاتى نەوتى عیراق دابەزیوە.

لە بارەی دۆخی ناوخۆی وڵاتیشەوە، روونیان کردووەتەوە: قەرزى ناوخۆیی 100 تریلیۆن دینارى تێپەڕاندووە و تێکڕاى بێکاریی بە ڕێژەى 30% بەرزبووەتەوە، ئەوەش وایکردووە توانا داراییەکانى حکومەت، لە پارەدارکردنى فۆڕمى خۆراک و پاڵپشتیی حکومى و مووچەى کەرتى گشتى بکەونە ژێر فشارێکى توندەوە.

لە کۆتایشدا، ئاماژەیان بەوەکردووە: لێکەوتەکانى لەسەر ئابورى و گوزەران بەخێرایی لە زیادبووندان، تواناى خێزانەکان و پڕۆژەکانى بۆ خۆڕاگرتن لەبەرامبەر قەیرانەکە لاوازکردووەو 85%ـى پڕۆژە بچووک و مامناوەندەکان داهاتیان کەمبووەتەوە، هاوکات بەهۆى کەمبوونەوەى کرێ، زۆرێک لە خێزانەکان ناچاربوون پەنا ببەنە بەر ستراتیجى خۆگونجاندن.

PUKMEDIA