ئێران و عوممان لەسەر رێڕەوێکی نوێی گەروی هورمز رێککەوتن

ميهر

ئیسماعیل بەقائی وتەبێژی وەزارەتی دەرەوەی ئێران

ئێران و عوممان لەسەر دیاریکردنی رێڕەوێکی نوێ لە گەروی هورمز گەیشتنە رێککەوتن و ئێرانیش دەڵێت: رێککەوتنەکە بەمانای ئارامبوونی گەرووی هورمز نایەت.

ئیسماعیل بەقائی وتەبێژی وەزارەتی دەرەوەی ئێران ،رایگەیاند، لەگەڵ عومان لەسەر تایبەتمەندییە جوگرافییەکانی رێڕەوی کەشتیوانی لە گەروی هورمز گەیشتوونەتە رێککەوتن.

وتیشی، لە دوو مانگی رابردووەوە وەک دوو وڵاتی هاوسنووری گەروەکە دانوستانەکانیان بەردەوام بووە تا رێڕەوێکی ئارام بۆ کەشتیوانیی بازرگانی دیاری بکەن و لایەنە تەکنیکی، یاسایی، ئاسایش و ژینگەیییەکانی لەلایەن دامەزراوە پەیوەندیدارەکانەوە تاوتوێ کراون.

وتەبێژی وەزارەتی دەرەوەی ئێران ئەوەشی خستەڕوو، "لە نەبوونی رێگریی لایەنی سێیەمدا"، راگەیەندراوی هەڵسەنگاندن و داڕشتنەوەی کۆتایی راگەیەندراوی هاوبەشی نێوان تاران و مەسقەت بڵاودەکرێتەوە، بەڵام هاوكات جەختی کردەوە کە رێککەوتنی هەردوو وڵات "بە تەنیا" بە مانای ئارامبوونی گەرووی هورمز نایەت.

PUKMEDIA