لەوەڵامی داواکاریی فراکسیۆنی یەکێتی، کۆمپانیایەکی نەوت هەلی کار بۆ کەرکوکییەکان دابین دەکات

PUKMEDIA

بەشێک لە کۆبونەوەکە

نوێنەرانی یەکێتی لە ئەنجومەنی نوێنەران لەگەڵ کۆمپانیایەکی نەوت گفتوگۆدەکەن بۆ دابینکردنی هەلی کار بۆ خەڵکی شاری کەرکوک.

دیلان غەفور ئەندامی ئەنجومەنی نوێنەران لە فراکسیۆنی یەکێتیی نیشتمانیی کوردستان بە PUKMEDIA ی راگەیاند: هاوبەش لەگەڵ پەرلەمانتار هەڵۆ جەباری لەگەڵ زەید ئەلیاسری بەڕێوەبەری گشتی کۆمپانیای بی پی بەریتانی لە عێراق کۆبوینەوەو گفتوگۆمانکرد لەسەر کارەکانی کۆمپانیاکە لە کێڵگە نەوتییەکانی کەرکوک.

وتیشی: لە دیدارەکەدا جەختمان لەوە کردەوە کە پێویستە خەڵکی پارێزگای کەرکوک و کۆمپانیا لۆکاڵییەکان سوودمەندبن لە کارەکانی کۆمپانیای بی پی لە کەرکوک، لەڕێی دروستکردنی هەلیکارو پێدانی پڕۆژە بە کۆمپانیاکانی کەرکوک.

ئاماژەی بەوەشکرد: زەید ئەلیاسری بەڵێنی دا ڕەچاوی داواکارییەکەمان بکات و خەڵک و پارێزگای کەرکوک بە گشتی سوودمەندبن لە کارکردنی ئەو کۆمپانیایە، بەتایبەت کە لەگەڵ دەستپێکردن بە کارەکانیان ساڵانە 10 ملیۆن دۆلار تەرخان دەکەن بۆ ئەنجامدانی پڕۆژە لە کەرتە جیاوازەکان و بە ئامانجی پێشخستنی کۆمەڵگە.

PUKMEDIA