سەرۆک وەزیرانی عیراق فەرمان دەکات کۆمپانیا نەوتییەکان 24 سەعات کار بکەن

نوسینگەى راگەیاندنى سەرۆک وەزیرانى عیراق

وێنەیەکى کۆبوونەوەکە

سەرۆک وەزیرانى عیراق لە کۆبوونەوەیەکی فراواندا لەگەڵ وەزارەتی نەوت جەختی لە گرنگی خێراکردنی چارەسەری کردەیی بۆ بەبازاڕکردن و فرۆشتنی نەوتی عیراق کردەوە، هاوکات رێنمایی دا کە کاری کۆمپانیا نەوتییەکان 24 سەعات بەردەوام بێت، بە شێوازێک کە بەردەوامیی پرۆسەکانی بەرهەمهێنان و هەناردەکردن و زیادکردنی رێژەکانیان دەستەبەر بکات.

نوسینگەی راگەیاندنی سەرۆکی ئەنجومەنی وەزیران لە راگەیەندراوێکدا رایگەیاند: عەلی فالح زەیدی سەرۆکی ئەنجومەنی وەزیرانى عیراق ئەمڕۆ دووشەممە 17ى8ى2026 سەرۆکایەتی کۆبوونەوەیەکی فراوانی وەزارەتی نەوتی کرد، بە ئامادەبوونی هەردوو وەزیری دارایی و نەوت و بەڕێوەبەری نوسینگەی سەرۆکی ئەنجومەنی وەزیران و بریکاران و بەڕێوەبەرە گشتییەکانی سەرجەم فەرمانگە و پێکهاتەکانی ناو وەزارەت.

ئاماژەى بۆ ئەوە کرد: لە کۆبوونەوەکەدا تیشک خرایە سەر ئەو پلان و ستراتیژییانەی کە وەزارەت ئامادەی کردوون، هەروەها میکانیزمەکانی مامەڵەکردن لەگەڵ لێکەوتەکانی قەیرانی گەرووی هورمز و ئەو چارەسەرە پێشنیارکراوانەی بۆ دەستەبەرکردنی بەردەوامیی هەناردەکردنی نەوتی عیراق و زیادکردنی تواناکانی هەناردەکردن.

ئەوەى خستەڕوو: هەر لە کۆبوونەوەکەدا باس لە دۆخی ئێستای کەرتی نەوت کرا، لەوانەش ئاستی بەرهەمهێنان و هەناردەکردن، لە ئەنجامی ئەو بارودۆخە نائاساییەی ناوچەکە بەخۆیەوە دەبینێت و ئەو دەرئەنجامانەی کە بەهۆی داخستنی گەرووی هورمزەوە هاتوەتە ئاراوە و بووەتە هۆی پاشەکشەیەکی گەورە لە رێژەی هەناردەکردنی نەوتی عیراق، لەم روانگەیەوە، توێژینەوە بۆ سیاسەت و پلان و چارەسەرە رێپێدراوەکان کرا بۆ مامەڵەکردن لەگەڵ لێکەوتەکانی قەیرانەکە و دەستەبەرکردنی بەردەوامیی هەناردەکردنی نەوت و بەهێزکردنی دەروازە جێگروەکانی هەناردەکردن.

ئاماژەى بۆ ئەوەش کرد: سەرۆکی ئەنجومەنی وەزیران جەختی لە گرنگی خێراکردنی چارەسەری کردەیی لە رێگەی نۆژەنکردنەوە و پەرەپێدانی بۆرییە نەوتییەکان و گرێبەستکردن لەگەڵ کۆمپانیا نێودەوڵەتییەکان بۆ بەبازاڕکردن و فرۆشتنی نەوتی عیراق کردەوە.

ئاشکراى کرد: عەلى زەیدى رێنمایی دا کە کاری کۆمپانیا نەوتییەکان 24 سەعات بەردەوام بێت، بە شێوازێک کە بەردەوامیی پرۆسەکانی بەرهەمهێنان و هەناردەکردن و زیادکردنی رێژەکانیان دەستەبەر بکات.


PUKMEDIA