دابەشكردنی مووچەی مانگی تەمووز دەستیپێكرد

PUKMEDIA

دراوى عیراقى

وەزارەتی دارایی و ئابوری حكومەتی هەرێمی كوردستان، ئەمڕۆ دابەشكردنی مووچەی مانگی تەمووزى دەستپێكرد و بەپێى خشتەى بڵاوکراوە ئەمڕۆ  وەزارەتەکانى "کەس و کارى شەهیدان و ئەنفالکراوان، زیندانیانى سیاسى و بەرکەوتووانى چەکى کیمیایى، خانەنشینانى شارستانى و پێشمەرگە، خوێندنى باڵاوتوێژینەوەى زانستى، تەندروستى، پەروەردە" مووچە وەردەگرن.

بە گوێرەى خشتەى بڵاوکراوەى وەزارەتی دارایی و ئابوری حكومەتی هەرێمی كوردستان دابەشکردنى مووچەى مانگى تەمووز سێ رۆژ دەخایەنێت، ئەمڕۆ سێ شەممە 18ی 8ی 2026 دەستیپێکرد و رۆژی پێنج شەممە 20 ی 8ى 2026 كۆتایی بەدابەشكردنی مووچە دێت.  

هەر بەپێی خشتەكەی وەزارەتی دارایی هەرێم، ئەمڕۆ وەزارەتەکانى "کەس و کارى شەهیدان و ئەنفالکراوان، زیندانیانى سیاسى و بەرکەوتووانى چەکى کیمیایى، خانەنشینانى شارستانى و پێشمەرگە، خوێندنى باڵاوتوێژینەوەى زانستى، تەندروستى، پەروەردە" مووچە وەردەگرن.

ئەمەش لە کاتێکدایە، دوێنێ 17ی 8ی 2026 وەزارەتی دارایی و ئابووری حكومەتی هەرێم رایگەیاند: بڕی (830,782,000,000) هەشت سەد و سی ملیار و حەوت سەد و هەشتا و دوو ملیۆن دینار، وەك تەموویلی مووچەی مانگی تەمووزی فەرمانبەران و مووچەخۆرانی هەرێمی كوردستان، بە رەسمی خرایە سەر هەژماری بانكی وەزارەتی دارایی و ئابووری حكومەتی هەرێمی كوردستان لە لقی هەولێری بانكی ناوەندیی عیراق.

راشیگەیاند: هاوشێوەی مانگەكانی رابردوو، وەزارەتی دارایی فیدراڵ بڕی (120,000,000,000) سەد و بیست ملیار دیناری وەك پشكی گەنجینەی فیدراڵ لە داهاتە نانەوتییەكانی هەرێمی كوردستان بۆ مانگی تەمووز، لە كۆی گشتیی تەموویلی مووچەكە بڕیوە (كەمكردووەتەوە).

ئاماژەی بەوەشكرد: هەر لە چوارچێوەی تەموویلی مووچەی مانگی تەمووزدا، بڕی (3,326,931,000) سێ ملیار و سێ سەد و بیست و شەش ملیۆن و نۆسەد و سی و یەك هەزار دینار نەنێردراوە، كە تایبەتە بە پڕكردنەوەی شایستەی مووچەی مانگەكانی رابردووی خانەنشینانی شارستانی و سەربازی لە هەرێمی كوردستان.

ئەمەش لەكاتێكدایە، رۆژی  22 ی تەممووزی 2026، وەزارەتی دارایی و ئابووری حكومەتی هەرێمی كوردستان لیستی مووچەی مانگی تەممووزی فەرمانبەران و مووچەخۆرانی هەرێمی كوردستان و ڕاپۆرتی تەرازووی پێداچوونەوەی مانگی حوزەیرانی ڕادەستی فەرمانگەی ژمێریاری وەزارەتی دارایی حكومەتی فیدراڵ كرد.


PUKMEDIA