هەوڵە دیپلۆماسییەكان نرخی نەوت دادەبەزێنن

PUKMEDIA

نرخی نەوت دابەزی

بەهۆی دانوستانەكانی ئێران، عومان و قەتەر بۆ كردنەوەی گەرووی هورمز، نرخی نەوت زیاتر دابەزی، بەشێوەیەك نرخی بەرمیلێك نەوتی برێنت بۆ 86 دۆلارو 77 سەنت دابەزی.

ئەمڕۆ 27ی 8ی 2026، نرخی نەوتی خاوی برێنت بەڕێژەی نزیكەی 1.2% دابەزی، بەشێوەیەك یەك بەرمیل نەوتی خاوی برێنت بە 86 دۆلارو 77 سەنتەوە مامەڵەی پێوەدەكرێت، هاوكات نرخی یەك بەرمیل نەوتی خاوی تەكساسی رۆژئاوای ئەمریكا (WTI) بۆ 81  دۆلارو 10 سەنت دابەزی.

هۆكاری سەرەكیی ئەم دابەزینەی نرخی نەوت دەگەڕێتەوە بۆ ئەو چاوەڕوانییانەی كە لەدانوستانەكانی نێوان ئێران، عومان و قەتەر دەكرێت، كەپێشبینی دەكرێت یارمەتیدەربن لەگەڕاندنەوەی هاتووچۆی كەشتیوانیی بازرگانی بە ناو ئەو رێڕەوە ئاوییە ستراتیژییەدا.

ئەمەش لەكاتێكدایە، نزیكەی 20%ی دابینكردنی نەوت و گازی جیهان بە شێوەیەكی ئاسایی لە گەرووی هورمزەوە تێپەڕدەبێت، بەڵام لەئێستادا ئاستی هاتووچۆ بەراورد بەپێش دروستبوونی ململانێكان زۆر دابەزیوەو دۆخەكەی بە هەستیاریی هێشتووەتەوە.

شیكەرەوان ئابوری دەڵێن، دەكرێت كردنەوەی بەردەوامی رێڕەوەكە نرخی نەوت زیاتر داببەزێنێت، لەكاتێكدا تێكچوونی دانوستانەكان یان ئاڵۆزبوونی سەربازی، دەتوانێت بەخێرایی دۆخەكە پێچەوانە بكاتەوە.

PUKMEDIA