لە بەغداد بەڕێوەبەرێکی پۆلیس و کارمەندێک کوژران

AFP

بەغدادی پایتەخت

لە هەڵمەتێکی لادانی زێدەڕۆیی لە بەغداد گرژی دروستبوو، لەئەنجامدا بەڕێوەبەری پۆلیسی ئەمیندارییەتی بەغداد و پۆلیسێک کوژران و چوار کارمەندی ديکەش برینداربوون، تۆمەتبارێکی رووداوەکەش دەستگیر کراوە.

شانەی راگەیاندنی ئەمنیی عیراق ئاشکرایکرد، لە کاتی جێبەجێکردنی ئەرکێکی رەسمیدا بۆ لادانی زێدەڕۆیی نیشتەجێبوون لە ناوچەی دۆرە لە باشوری بەغداد، هێزە ئەمنییەکان و مەفرەزەکانی خزمەتگوزاری لەلایەن خاوەنی زیادەڕەوییەکانەوە رووبەڕووی تەقەکردن بوونەوە.

دەشڵێت: لە ئەنجامدا، عەمید هیشام محەمەد بەڕێوەبەری بەشی پۆلیسی ئەمیندارییەتی بەغداد لە بەشی کەرخ و پۆلیسێک کوژران، هەروەها چوارکارمەندی دیکە برینداربوون کە پێکهاتوون لە کارمەندێکی پۆلیسی فیدراڵی، دوو کارمەندی پۆلیسی ئەمیندارییەتی و کارمەندێکی ئەمیندارییەتی بەغداد.

هاوکات، بە فەرمانی فەرماندەی ئۆپراسیۆنەکانی بەغداد، هێزە ئەمنییەکان گەمارۆیەکی توندیان بەسەر ناوچەکەدا سەپاندووە و دەروازەکانیان داخستووە، لە ئۆپراسیۆنێکی کێوماڵکردنی فراواندا تا ئێستا کەسێکی تۆمەتبار دەستگیرکراوە و گەڕان بەدوای تاوانبارانی تردا بەردەوامە.

لەلایەکی دیکەوە، عەلی زەیدی سەرۆکوەزیرانی عیراق، لە پەیامێکی سەرەخۆشیدا رایگەیاند: هێزە ئەمنییەکانمان راسپاردووە، گەمارۆی ناوچەکە بدەن و رێکارەکان توند بکەنەوە، هەموو ئەو کەسانەشی لەو کردەوەیە تێوەگلاون دەدرێنە دادگا.


PUKMEDIA