ژمارەی گیانلەدەستدان بە لافاوەکەی نیپاڵ بۆ 469 کەس بەرز بووەوە

میدیاکان

پرۆسەی رزگارکردنی زیانلێکەوتووان بەردەوامی هەیە

وەزارەتی ناوخۆی نیپاڵ ئاشکرای کرد، بەهۆی لافاوەکەی چەند رۆژی رابردووەوە، تاوەکو ئێستا 469 کەس گیانیان لەدەستداوە و 977 کەسیش بێسەرو شوێن بوون.

وەزارەتی ناوخۆی نیپاڵ، لە راگەیەندراوێکیدا، ئاماژەی بەوەشکردووە، کە ژمارەی قوربانیان لە 389 کەسەوە بۆ 469 کەس بەرزبووەتەوە، هەروەها لەناو بێسەروشوێنانیشدا 517 کەسی بیانی بوونیان هەیە.

دەسەڵاتدارانی نیپاڵ، هۆکاری لافاوەکەیان بۆ روودانی بوومەلەرزە گێڕاوەتەوە، کە بووەتە هۆی داڕمانی زەوی و هاتنە دەرەوەی ئاوێکی زۆر لە چیاکانەوە بە ئاڕاستەی دەریای بوتی کوچی، کە لە دواتردا بووەتە هۆی دروستبوونی لافاوەکە.

لەلایەکی دیکەوە، دەستەی رووپێوی جیۆلۆجۆی ئەمریکا، بەپێچەوانەی بۆچوونی دەسەڵاتدارانی نیپاڵ ئاشکرای کردووە، بوومەلەرزە رووینەداوە، بەڵکو بەهۆی هەرەسی دەریای سەهۆڵییەوە بووە، کە بووەتە هۆی سەرهەڵدانی لافاوەکە.

دەسەڵاتدارانی نیپاڵ بە ئاژانسی رۆیتەرزیان راگەیاندووە، کەگەڕان و پشکنین بەدوای قوربانیان بەردەوامی هەیە، هەرچەندە لەمپەری گەورە هاتووتە بەردەم کارەکانیان.

PUKMEDIA