وەزارەتی ناوخۆی فیدڕاڵی: چوار کەس لەسەر ڕووداوەکەی دۆرە دەستگیر کران

پەڕەی رەسمی وەزارەت

لۆگۆی وەزارەتی ناوخۆی عیراق

وەزارەتی ناوخۆی عیراق، دەستگیرکردنی چوار کەسی لەسەر ڕووداوەکەی دوێنێ ناوچەی دۆرە ڕاگەیاند، دووپاتیشی دەکاتەوە، کە فەرمانی دەستگیرکردنبۆ ژمارەیەک تۆمەتباری دیکە دەرچووە و گەڕان بەدوایاندا بەردەوامە.

میقداد میری، بەڕێوەبەری فەرمانگەی پەیوەندییەکان و ڕاگەیاندن لە وەزارەتی ناوخۆی عیراق، ڕایگەیاند: دەزگا ئەمنییەکان هەوڵێکی گەورەیان دا کە ئەنجامەکەی دەستگیرکردنی چوار کەس بوو، ئێستاش لێکۆڵینەوە لەگەڵیاندا بەردەوامە و هەوڵی دەستگیرکردنی  تۆمەتبارانی دیکەش بەردەوامە.

 ئاماژەی بەوەش کرد: فەرمانی دەستگیرکردنی دادوەری بۆ ژمارەیەک لە تێوەگلاوان دەرچووە.

میقداد میری وتیشی: ڕێنمایی لەلایەن عەلی زەیدی، سەرۆکوەزیرانەوە هەیە بۆ بەدواداچوونی تاوانباران و ڕادەستکردنیان بە دادگا.

 ئاماژەی بەوەشدا: بریکاری پێشکەوتووی وەزارەتی ناوخۆ و هەموو لایەنە ئەمنییەکان چاودێریی دۆسیەکە دەکەن بۆ ئەوەی تاوانباران ڕادەستی دادپەروەری بکرێن.

بەڕێوەبەری فەرمانگەی پەیوەندییەکان و ڕاگەیاندن لە وەزارەتی ناوخۆ جەختی کردەوە کە ڕێکاری یاسایی بەرانبەر هەر کەسێک دەگیرێتە بەر کە لەو ناوچانەدا یاسای شکاندبێت، چ ئەوانەی لە پرۆسەی فرۆشتنی هەرەمەکی تێوەگلاون یان سەرپێچییەکانی دیکەش.

ڕوونیشی کردەوە کە لێکۆڵینەوەکان لەم بارەیەوە کراوەن و شارەوانیی بەغداش هەوڵەکانی خۆی بۆ بەدواداچوونی دۆسیەکە دەستپێکردووە.

سەبارەت بەو چەکانەی لە ڕووداوەکەدا بەکارهێنراون، لیوا میقداد میری وتی: بە هیچ شێوەیەک چەکی قورس لە ناوچەکەدا بەکارنەهێنراوە، بەڵکو تەنها چەکی سووک بەکارهێنراوە.

لە کۆتاییدا، میقداد میری، بەڕێوەبەری فەرمانگەی پەیوەندییەکان و ڕاگەیاندن لە وەزارەتی ناوخۆی عیراق ئاماژەی بەوە کرد کە هەر شوێنێک سەرپێچی تێدا بکرێت، لەلایەن شارەوانیی بەغدا و وەزارەتی ناوخۆوە ڕێکاری پێویستی بەرانبەر دەگیرێتە بەر.
ئەمەش لەکاتێکدایە، دوێنێ 27ی8ی2026، لە هەڵمەتێکی لادانی زێدەڕۆیی لە بەغداد گرژی دروستبوو، لەئەنجامدا بەڕێوەبەری پۆلیسی ئەمیندارییەتی بەغداد و پۆلیسێک کوژران و چوار کارمەندی ديکەش برینداربوون.

PUKMEDIA