ئایسلەندییەكان دەستپێكردنەوەی دانوستان بۆ ئەندامێتی لەیەكێتیی ئەوروپا رەتدەكەنەوە

ئالای ئایسلاند

Reuters

هاووڵاتیانی ئایسلەند بەڕێژەی 52.5%ی دەنگەكان، هەوڵەكانی حكومەتیان بۆ دەستپێكردنەوەی دانوستانەكانی بۆ بوون بە ئەندام لەیەكێتیی ئەوروپا رەتكردەوە، هۆكاری سەرەكیی سەركەوتنی بەرەی نەخێریش بۆ مەترسیی لەدەستدانی سەروەریی وڵاتەكە دەگەڕێتەوە.

بەپێی راپۆرتێكی كەناڵی RUV، خەڵكی ئایسلەند بەڕێژەی 52.5%  دەنگی نەخێر و بەڕێژەی 47.5% دەنگی بەڵێ، دەستپێكردنەوەی دانوستانیان بۆ ئەندامێتی لە یەكێتیی ئەوروپا رەتكردەوە، هۆكاری سەرەكیی رەتكردنەوەكەش، پاراستنی سەروەریی وڵاتەكەو كۆنترۆڵكردنی سەرچاوەی سامانی ماسییە.

هەر بەپێی راپۆرتەكەی كەناڵی RUV، ئەم ئەنجامە بڕۆكسل بێئومێد دەكات، چونكە ئایسلەندیان وەك دەرفەتێك دەبینی بۆ بەهێزكردنی ریزەكانیان و بەهێزكردنی ئاسایشی ناوچەی جەمسەری باكوور.

هاوكات بەرەی بەڵێ پێیان وابوو ئەندامێتی یەكێتیی ئەوروپا ئابووری وڵات جێگیر دەكات و رێژەی سوود كەم دەكاتەوەو ئاسایش لە بەرامبەر ئاڵۆزییە جیهانییەكان (وەك جەنگی ئۆكراینا) دابین دەكات، لەبەرامبەردا بەرەی نەخێر پێیان وابوو چوونە ناو یەكێتییەكە سەروەریی ئایسلەند كەم دەكاتەوەو زیان بە كەرت و سەرچاوەی سامانی ماسی و راوكردنی ماسی دەگەێنێت.

ئەمەش لەكاتێكدایە، ئایسلەند ساڵی 2009 بەهۆی قەیرانی داراییەوە داوای ئەندامێتی لە یەكێتیی ئەوروپا كرد، بەڵام لەساڵی 2013 ەوە دانوستانەكان راگیراون، هاوكات هەوڵەكانی دۆناڵد ترەمپ بۆ كۆنتڕۆڵكردنی گرینلاند دڵگرانی لای ئایسلەند دروستكردووە، چونكە ئایسلەند كە بە دووری 180 میل هاوسنووری ئاوی گرینلاندە سوپای سەربەخۆی نییەو پشتی بە ناتۆ بەستووە، بۆیە بەشێك لەهاووڵاتیان پێیانوابوو نزیكبوونەوە لەیەكێتیی ئەوروپا پارێزبەندی و ئاسایشی زیاتریان بۆ دابین دەكات.

PUKMEDIA