عیراق دوو گەندەڵکاری دیکەی بە توندی سزادا

فەرمانگەی راگەیاندن

دەستەی دەستپاکی عیراق

دەستەی دەستپاکی عیراق، ئاشکرای کرد هەریەکە لە عەلی بەهادلی، بریکاری پێشووی وەزارەتی نەوت و تەڵاڵ زەوبەعی، پەرلەمانتاری پێشوو سزای حەوت ساڵ زیندانییان بەسەردا سەپێنراوە، لەگەڵ گەڕانەوەی پارەی گەندەڵی و پێبژاردنیان بەهۆی زیانگەیاندنیان بە سامانی گشتی.

 بەپێی راگەیەندراوێکی دەستەکە، تەڵاڵ زەوبەعی بەبڕی 35 ملیار دینار پارەی گەندەڵی کۆکردووەتەوە، بەڵام دادگا ناوبراوی ناچار کردووە، بڕی 70 ملیار دینار بۆ خەزێنەی دەوڵەت بگێڕێتەوە، بەو پێیەی زیانی بە سامانی گشتی گەیاندووە و پێبژاردنیشی دەکەوێتە ئەستۆ.

هاوکات،  عەلی بەهادلی، بریکاری پێشووی وەزارەتی نەوت، بەبڕی 26 ملیار و 500 ملیۆن دینار پارەی گەندەڵی کۆکردووەتەوە، بەڵام دادگا ناوبراو ناچار دەکات، بڕی 53 ملیار دینار وەک گەڕاندنەوەی پارەی گەندەڵی و پێبژاردن بۆ خەزێنەی حکومەت بگێڕێتەوە.

ئەمەش لەکاتێکدایە، رۆژی 28ی8ی2026 دادگاى ناوەندیی بەرەنگاربوونەوەى تاوانەکانى گەندەڵى، سزاى سێ ساڵ زیندانى توند و پێبژاردنی بەسەر مەحموود عەبدوڵڵا فەرحان، بەڕێوەبەرى بەشى کاروبارى دارایی لە کۆمپانیاى دابەشکردنى کارەباى ناوەڕاست سەپاند، کە دادگا جگە لە سزاى زیندانى توند، پێبژاردنى بە بڕى ملیارێک و 170 ملیۆن و 450 هەزار دینار و 203 هەزار دۆلاری بەسەردا سەپاند.

 بەرەبەیانیی رۆژی یەکشەممە، 28ی6ی 2026، هێزێکی هاوبەشی دژەتیرۆر، سوپا و دەستەی دەستپاکیی عیراق ئۆپەراسیۆنێکی فراوانیان لە بەغداد و چەند پارێزگایەکی دیکە بە ناوی هەڵمەتی بەرەبەیان کرد، لە هەڵمەتەکەدا تاوەکو ئێستا 21 بەرپرس و پەرلەمانتار دەستگیر کراون، کە 13ـیان پەرلەمانتاری ئەم خولەن و یەکێکیشیان پەرلەمانتاری خولی رابردووە. هەروەها دوو بریکاری وەزارەتی نەوت لە نێو دەستگیرکراوەکاندان، کە ئەمڕۆ یەکێکیان سزای بەسەردا سەپێندرا.

PUKMEDIA