وەزیرى پەروەردە: لە سبەینێوە مامۆستایان پەیوەندى بە ناوەندەکانى خوێندنەوە بکەن

PUKMEDIA

وێنەیەکى کۆنگرە رۆژنامەوانییەکە

وەزیری پەروەردەى حکومەتى هەرێمى کوردستان رایگەیاند: لە سبەینێوە مامۆستایان پەیوەندی بە ناوەندەکانی خوێندنەوە دەکەن و پڕۆسەیەکی راهێنانیش دەستپێدەکات.

ئەمڕۆ دووشەممە 31ى8ى2026 ئالان حەمە سەعید وەزیرى پەروەردەى حکومەتى هەرێمى کوردستان لە کۆنگرەیەکى رۆژنامەوانیدا ئامادەکارییەکانی وەزارەتەکەی بۆ ساڵی نوێی خوێندن خستەڕوو و رایگەیاند: لە مانگی شەشەوە کار بۆ پرۆسەکە کراوە، لەوانەش چاپکردنی نزیکەی 20 ملیۆن کتێبی نوێ کە بڕیارە تا 10ی 9 رێژەی 99%یان بگەنە هەرێم، هەروەها چاککردنى رەحلەی پۆلەکان بە هەماهەنگی لەگەڵ رێکخراوەکان، ئەنجامدانی ریفۆرم لە خوێندن و خوێندنی پیشەییدا و ئاڕاستەکردنی نووسراو بۆ وەزارەتی سامانە سروشتییەکان لە رێگەی ئەنجومەنی وەزیرانەوە بۆ دابینکردنی نەوتی سپی بۆ خوێندنگاکان، لەپاڵ دابینکردنی تەواوی پێداویستییەکان بۆ ئەو بینا و خوێندنگە نوێیانەی کە ئەمساڵ دەکرێنەوە.

راشیگەیاند: لە سبەینێوە مامۆستایان پەیوەندى بە ناوەندەکانى خوێندنەوە دەکەن، هەروەها پرۆسەیەکى راهێنان دەستپێدەکات بۆ ماوەى 19 رۆژ، کە هەر مامۆستایەک 5بۆ6 رۆژ لەناو ناوەندەکانى خوێندندا راهێنان دەکات.

PUKMEDIA