سەرۆککۆمار: بەدواداچوونی جددی بۆ چارەسەرکردنی گرفتەکانی خانەقین دەکەین

نوسینگەی رۆژنامەوانی سەرۆککۆمار

سەرۆک کۆمار و وەفدێکی کەسایەتی سەرۆک هۆزەکانی قەزای خانەقین

ئەمڕۆ سێشەممە 1ی9ی2026 نزار ئامێدی سەرۆک کۆماری عیراق، لە کۆشکی سەلام لە بەغداد، بە ئامادەبوونی د. خالید شوانی وەزیری داد، پێشوازی لە وەفدێکی کەسایەتی سەرۆک هۆزەکانی قەزای خانەقین کرد.

لە کۆبوونەوەکەدا، چەندین پرسی پەیوەندیدار بە رەوشی خزمەتگوزاری و ئابووری و گەشەپێدانی قەزای خانەقین تاوتوێ کران و تیشک خرایە سەر رێگەچارەکانی وەڵامدانەوەی داواکارییەکانی دانیشتووانی ناوچەکە.

سەرۆک کۆمار جەختی لەوەشکردەوە، پێکەوەژیانی ئاشتییانە و تەبایی نێوان تەواوی پێکهاتەکانی خانەقین، بنەمای سەرەکیی بەرەوپێشبردنی ناوچەکە و بەدیهێنانی گەشەپێدانی بەردەوامە.

هەروەها ئاماژەی بە گرنگیی بەهێزکردنی گیانی لێکتێگەیشتن و هاوکاری کرد بە مەبەستی پاراستنی ئاشتیی کۆمەڵایەتی و بەرزکردنەوەی ئاستی متمانەی یەکتری، لە بەشێکی تری قسەکانیدا، سەرۆک کۆمار جەختی لە پێویستیی گوێگرتن لە داواکارییەکانی خەڵکی خانەقین کردەوە و رایگەیاند: لە رێگەی دامەزراوە و لایەنە پەیوەندیدارەکانەوە بەدواداچوونی جددی بۆ چارەسەرکردنی گرفتەکان دەکرێت.

لە بەرامبەردا، ئەندامانی وەفدەکەی قەزای خانەقین خۆشحاڵی و پێزانینی خۆیان بۆ گرنگیدانی سەرۆک کۆمار بە دۆخی قەزاکە دەربڕی و جەختیان لە گرنگیی بەردەوامیی هەوڵەکان کردەوە بۆ باشترکردنی ئاستی خزمەتگوزارییەکان و هێنانەدی خواستی هاووڵاتییانی شارەکە.

PUKMEDIA