زەیدی داوای زیادکردنی بڕی بەرهەمهێنانی نەوت لە کێڵگەکانی هەرێم دەکات

نوسینگەی راگەیاندن

بەشێک لە کۆبوونەوەکە

عەلی زەیدی سەرۆکوەزیرانی عیراق، دووپاتی دەکاتەوە کە پێویستە قەبارەی بەرهەمهێنانی نەوتی عیراق هاوتای یەدەگ و توانای نەوتی و ژمارەی دانیشتووانەکەی بێت و تا ساڵی 2030 بۆ نزیکەی 10 ملیۆن بەرمیل نەوت زیاد بکرێت، داواشدەکات بڕی بەرهەمهێنانی نەوت لە کێڵگەکانی هەرێمی کوردستان زیاد بکرێت.

بەپێی نوسینگەی راگەیەندنی سەرۆکوەزیرانی عیراق، ئەمڕۆ عەلی زەیدی سەرۆکوەزیرانی عیراق، بە ئامادەبوونی هەردوو وەزیری دارایی و نەوت و ژمارەیەک لە ڕاوێژکاران، سەرپەرشتی کۆبوونەوەیەکی کادیرانی پێشکەوتووی وەزارەتی نەوتی کرد، بە مەبەستی تاوتوێکردنی پلانی ستراتیژی بۆ پەرەپێدان و زیادکردنی بەرهەمهێنانی نەوت لە عیراق بۆ ساڵانی 2027–2030.
لە کۆبوونەوەکەدا،زەیدی جەختی لەوە کردەوە کە پێویستە قەبارەی بەرهەمهێنانی نەوتی عیراق هاوتای یەدەگ و توانای نەوتی و ژمارەی دانیشتووانەکەی بێت، تا بتوانێت پێداویستییەکانی هاووڵاتییان و داواکارییەکانی گەشەپێدان دابین بکات؛ هەروەها جەختی لە گرنگیی نۆژەنکردنەوە و پەرەپێدانی ژێرخان و تواناکانی هەناردەکردن کردەوە بە جۆرێک لەگەڵ زیادبوونی چاوەڕوانکراوی بەرهەمهێناندا بگونجێت.

سەرۆک وەزیرانی عیراق، داواشی کرد، پێویستە بەرهەمهێنانی غاز لە ئاست پێداویستییەکانی ناوخۆدا بێت و رێگری لە بەفیڕۆچوونی بگیرێت.

لە کۆتایشدا، عەلی زەیدی سەرۆکوەزیرانی عیراق، داوای کرد کە بڕی بەرهەمهێنان لە کێڵگە نەوتییەکانی هەرێمی کوردستان زیاد بکرێت، لەگەڵ فراوانکردنی کارەکانی گەڕان و پشکنین و زیادکردنی بلۆکە نەوتییەکان، بۆ ئەوەی تا ساڵی 2030 بڕی وەبەرهێنان نزیکەی 10 ملیۆن بەرمیل لە ڕۆژێکدا زیاد بکرێت.

PUKMEDIA