ناوی زانكۆی سلێمانی چووە كتێبی گینسەوە

PUKMEDIA

ناوی زانكۆی سلێمانی چووە كتێبی گینسەوە

زانكۆی سلێمانی بەهۆی دروستكردنی گەورەترین رستەی بە درەخت روێندراو، ناوی چووە كتێبی گینسەوەو ئەم هەنگاوە ژینگەییەش، لەلایەن سەرۆكایەتی زانكۆ، پارێزگاری سلێمانی و وەزارەتی خوێندنی باڵاوە وەك هەنگاوێكی گرنگ بۆ نێودەوڵەتیكردنی زانكۆی دایك و بەرزكردنەوەی پێگەی سلێمانی لەسەر نەخشەی ژینگەیی و داهێنانی جیهانی هەڵسەنگێندرا.

پڕۆفیسۆر د.كۆسار محەمەد عەلی، سەرۆكی زانكۆی سلێمانی، لەمەڕاسیمی راگەیاندنی چوونە ناو كتێبی گینسی زانكۆی سلێمانی، رایگەیاند: زانكۆی دایك لەڕیزبەندییە جیهانییەكاندا بەرەوپێشچوونی بەردەوامی تۆماركردووەو سەرۆكایەتی زانكۆی سلێمانیش لەبواری بەڕێوەبردن و كوالێتیدا هەنگاوی گەورەی ناوەو یەكەم زانكۆی هەرێمی كوردستانە كەتوانیویەتی بڕوانامەی نێودەوڵەتیی سیستمی بەڕێوەبردنی كوالێتی (ISO) بەدەستبهێنێت، ئەمەش ئاستی بەرزی بەڕێوەبردن و خوێندن لە زانكۆی دایك دەسەلمێنێت.

راشیگەیاند: ئەم پڕۆژەیە بەشێكە لەخواستەكانمان بۆ بەنێودەوڵەتی كردنی زانكۆی دایك و بە رواندنی شەش هەزار نەمامیش پەیوەندییەكی ناوازە لەنێوان مرۆڤ و سروشت، زانست و زانكۆو كۆمەڵگەدا دروستدەكات.

هەر لە مەڕاسیمەكەدا، د. هەڤاڵ ئەبوبەكر، پارێزگاری سلێمانی رایگەیاند: ناوی سلێمانی بەڕووی جیهاندا كرایەوەو ئەم دەستكەوتەش هی هەموومانە، هاوكات لەمانگەكانی ئایندەدا چەندین دەستكەوتی دیكە بۆ سلێمانی دەبینن، چونكە تەنها لەم مانگەدا بەشداریی پێنج سێكتەری جیهانیی كارا دەكات. 

راشیگەیاند: سلێمانیمان خستووەتە سەر نەخشەی جیهانیی داهێنانەكان و ئەمەش ناو و ناوبانگی كورد دەپارێزێت و لەدۆخی خۆ بەكەم زانین و چاوەڕوانی نێودەوڵەتی دەردەچین و دەبێت سلێمانی بكەینە بەشێك لەدابینكردنی سەرچاوەی وزەی نێودەوڵەتی و ژینگەو ئاوی پاك و كێڵگەی نێودەوڵەتی.

هاوكات د. ئارام محەمەد قادر، وەزیری خوێندنی باڵاو توێژینەوەی زانستی رایگەیاند: پیرۆزبایی لە سەرۆكی زانكۆو ستافەكەی دەكەم، هاوكات هەموو ئەو باخەوانانەی لەزانكۆی سلێمانی كاردەكەن، لەوەزارەتەوە پاداشتی ماددیی و مەعنەویان دەكەین.

زانكۆی سلێمانی كە بەزانكۆی دایك دەناسرێت، لەساڵی 1968 دامەزراوە، دێرینترین زانكۆی هەرێمی كوردستانەو رۆڵێكی مێژوویی و رێبەرایەتی هەبووە لە پێگەیاندنی هەزاران پسپۆڕو ئەكادیمی لەبوارە جیاوازەكاندا، هاوكات لەسەر ئاستی ناوخۆیی و جیهانی بەردەوام لەڕیزبەندییە زانستییە بەرزەكاندایە.

هاوكات زانكۆی سلێمانی لەساڵانی دواییدا سەرنجی تایبەتی خستووەتە سەر پڕۆژەی سەوزكردن، روبەڕوبوونەوەی گۆڕانی كەشوهەوا و بەنێودەوڵەتیكردنی زانكۆكە، پڕۆژەی دروستكردنی گەورەترین رستە بە رواندنی شەش هەزار نەمام و چوونە ناو كتێبی گینس بۆ ژمارە پێوانییەكان، بەشێكە لەم روانگە ژینگەیی و زانستییە كە ئامانجی بەستنەوەی زیاتری زانستە بەسروشت و كۆمەڵگەوە.

PUKMEDIA