نزار ئامێدى: ئاشکراکردنی چارەنووسی قوربانیانی گۆڕە بەکۆمەڵەکان ئەرکێکی نیشتمانیی و مرۆڤدۆستانەیە

نوسینگەى راگەیاندنى سەرۆک کۆمار

وێنەیەکى کۆبونەوەکە

ئەمڕۆ پێنجشەممە 3ی ئەیلولی 2026 نزار ئامێدی سەرۆک کۆمارى عیراق لە کۆشکی سەلام لە بەغداد، پێشوازیکرد لە تیمی نیشتمانی تایبەتمەند بە هەڵدانەوەی گۆڕە بەکۆمەڵەکان.

لە دیدارەکەدا سەرۆک کۆمار دووپاتی کردەوە کە ئاشکراکردنی چارەنووسی قوربانیانی گۆڕە بەکۆمەڵەکان ئەرکێکی نیشتمانیی و مرۆڤدۆستانەیە، جەختیشی کردەوە لە گرنگی بەردەوامی هەوڵەکان بۆ هەڵدانەوەی گۆڕەکان و دەرهێنانەوەی ڕوفاتەکان و ناسینەوەی قوربانیان و گەڕاندنەوەی بۆ خێزانەکانیان، جەختی لە پێویستی دابینکردنی دادپەروەری بۆ ئەو خێزانانە کردەوە کە هێشتا چاوەڕوانی هەواڵی ئازیزەکانیانن، هەروەها بە دۆکیۆمێنتکردنی ئەو تاوانانەی کە بەرامبەر گەلی عیراق ئەنجامدراون و پاراستنی یادەوەری نیشتمانی.

سەرۆک کۆمار گوێی لە ڕونکردنەوەیەک گرت سەبارەت بە گرنگترین دەستکەوتەکانی تیمەکە و ئەو تەحەددایانەی کە ڕووبەڕووی دەبێتەوە، جەختیشی لە پێویستی پێشکەشکردنی پاڵپشتی پێویست و ئاسانکاری بۆ ڕێکارەکانی پەیوەست بە هەڵدانەوەی گۆڕەکان و تەواوکردنی ناسینەوەی ڕوفاتەکان بە گوێرەی بنەما یاسایی و زانستییەکان کردەوە.

PUKMEDIA