کۆچ و کۆچبەرانی عیراق:21 هەزار هاووڵاتی لە کەمپی هۆل گەڕێندراونەتەوە

سانا

کەمپی هۆل

وەزارەتی کۆچ و کۆچبەرانی عیراق ئاشکرای دەکات، تاوەکو ئێستا 21 هەزار کەسیان لە کەمپی هۆل گێڕاوەتەوە و هیچ کێشەیەکی ئەمنی یان دەرونیان دروست نەکردووە، دەشڵێت: کەمپەکە بەم نزیکانە دادەخرێت و زیاتر لە هەزار عیراقی تێدا ماوە.

کەریم نوری وتەبێژی وەزارەتی کۆچ و کۆچبەرانی عیراق، لە لێدوانێکیدا رایگەیاند: کەمپی هۆڵ لە باکوری رۆژهەڵاتی سوریا بریتی یە لە بۆمبێکی تەوقیتکراوە لە هەرکاتێکدا بێت دەتەقیەوە، بەڵام عیراق بەسەرکەوتوویی پوچەڵی کردەوە و، ئێستا ژمارەیەکی کەمی تێدا ماوە.

ئاماژەی بەوەشکرد: تاوەکو ئێستا 21 هەزار کەس لە کەمپەکە گێڕدراونەتەوە بۆ ناوچەکانی خۆیان و هیچ کێشەیەکی ئەمنی و کۆمەڵایەتییان دروست نەکردووە.

کەریم نوری، روونیشی کردەوە: کە تاوەکو ئێستا هەزار و 200 کەس لە کەمپەکە ماون کە ژمارەیان زۆر کەمە، بۆیە بەم زووانە دادەخرێت.
ئەمەش لەکاتێکدایە، لە مانگی نۆی ساڵی 2025، کۆنگرەیەکی نێودەوڵەتی لە نوسینگەی سەرەکی نەتەوەیەکگرتووەکان بەڕێوەچوو، کە تیایدا باس لە چارەسەرکردنی کەمپەکە و مەترسییەکانی کرا.

PUKMEDIA