دەستپاکی عیراق: لە مانگێکدا 78 تۆمەتبار لەکاتی ئەنجامدانی تاواندا دەستگیرکراون

میدیاکان

لۆگۆی دەستەی دەستپاکی عیراق

دەستەی دەستپاکی عیراق ئاماری کار و چالاکییەکانی مانگی ئابی 2026ی بڵاوکردەوە و ڕایگەیاند، لە ماوەی ئەو مانگەدا 191 پرۆسەی دەستبەسەرداگرتن لە دۆسیەکانی پەیوەست بە پاراستنی سامانی گشتی و ئەرکی دەوڵەتدا ئەنجام دراون و 78 تۆمەتباریش لەکاتی ئەنجامدانی تاواندا دەستگیرکراون

بەگوێرەی ڕاگەیەندراوێکی دەستەی دەستپاکی : لە ماوەی ئەو مانگەدا 78 تۆمەتبار لە کاتی ئەنجامدانی تاواندا دەستگیرکراون، هەروەها 27 فەرمانی دادوەری بۆ دەستگیرکردن و بانگهێشتکردنی کەسانی خاوەن پلەی تایبەت دەرچووە، هاوکات 75 كەسیش وەک تاوانبار ناسێنراوە، هەروەها 81 کەسی دیکەش سزای جۆراوجۆیان بەسەردا سەپێندراوە.

دەستەی دەستپاکی ئاماژەی بەوەشکردووە: کە هەر لەو ماوەیەدا 53 دۆسیەی تایبەت بە وەرگرتنەوەی خانووبەرە و سامانی بەقاچاخبراو بەدواداچوونیان بۆ کراوە، هەروەها سێ هەزار و 449 فۆڕمی ئاشکراکردنی ئەستۆپاکی دارایی لە بەرپرسان وەرگیراوەتەوە.

لە بەشێکی دیکەی ڕاپۆرتەکەدا هاتووە کە 71 سەردانی مەیدانی بۆ چاودێریکردنی کاری فەرمانبەران لە دامودەزگاکانی دەوڵەتدا ئەنجامدراوە، لەگەڵ ئامادەکردنی سێ ڕاپۆرت بۆ دەستنیشانکردنی کێشە و دیاردە نەرێنییەکان.

PUKMEDIA