ئەمڕۆ ئەنجومەنی نوێنەرانی عیراق خوێندنەوەی یەکەم بۆ سێ پڕۆژەیاسا دەکات

راگەیاندنی ئەنجومەنی نوێنەرانی عیراق

وێنەى کۆبونەوەیەکى رابردو

بڕیارە ئەمڕۆ 7ى 9ی 2026، ئەنجومەنی نوێنەرانی عیراق دانیشتنی ژمارە (16)ی خۆی لە چوارچێوەی خولی هەڵبژاردنی شەشەم، ساڵی یەکەمی یاسادانان و وەرزی دووەمدا ئەنجامبدات، کە تێیدا خوێندنەوەی یەکەم بۆ سێ پڕۆژەیاسا ئەنجام دەدات.

بەگوێرەى کارنامەى بڵاوکراوە، ئەمڕۆ ئەنجومەنى نوێنەران لە سەعات (1:00)ی دوای نیوەڕۆ کۆبوونەوەى خۆى بە خوێندنەوەی چەند ئایەتێک لە قورئانی پیرۆز دەستپێدەکات و بەرنامەی کارەکە ئەم بڕگانەی خوارەوە لەخۆدەگرێت:

خوێندنەوەی یەکەم بۆ پڕۆژەیاسای چوونەپاڵ ڕێککەوتننامەی بنەڕەتیی ڕێکخراوی گەشەپێدانی ئافرەتان لە وڵاتانی ئەندام لە ڕێکخراوی هاوکاریی ئیسلامی (لەلایەن لێژنەی پەیوەندییەکانی دەرەوە، کە لە 2 ماددە پێكهاتووە).

خوێندنەوەی یەکەم بۆ پڕۆژەیاسای هەموارکردنی یەکەمی یاسای مامەڵەکردن بە کەرەستە کشتوکاڵییەکان ژمارە (46)ی ساڵی 2012 (لەلایەن لێژنەی کشتوکاڵ و سەرچاوەکانی ئاو و ژینگە و زۆنگاوەکان، بە هاوکاری لێژنەی یاسایی، کە لە 8 ماددە پێكهاتووە).

خوێندنەوەی یەکەم بۆ پڕۆژەیاسای شەراکەت لەنێوان کەرتی گشتی و کەرتی تایبەتدا (لەلایەن لێژنەی ئابووری و پێشەسازی و بازرگانی، کە لە 27 ماددە پێكهاتووە).

PUKMEDIA