کۆمسیۆن بەکارھێنانی کارتى نیشتمانی لە ئامێرەکانی ھەڵبژاردندا تاقیدەکاتەوە

PUKMEDIA

لۆگۆی کۆمسیۆن

کۆمسیۆنی باڵای سەربەخۆی ھەڵبژاردنەکانی عیراق ڕایگەیاند: بەم زوانە تاقیکردنەوەیەک بۆ کارکردنی کارتی نیشتمانی لەسەر ئامێرەکانی ھەڵبژاردن ئەنجام دەدەین.

جومانه غەلای وتەبێژی کۆمسیۆنی باڵای سەربەخۆی ھەڵبژاردنەکانى عیراق بە PUKMEDIA  ى ڕاگەیاند: کۆمسیۆن لەلایەن وەزارەتی ناوخۆوە ژمارەیەک تۆماری تایبەت بە فەرمانبەرانی کۆمسیۆنی پێگەیشتووە، ئەمەش بە مەبەستی ئەنجامدانی تاقیکردنەوە لەسەر ئامێرەکانی هەڵبژاردن تاوەکو لە نزیکەوە ئاستی ئامادەیی ئامێرەکان و توانای بەکارهێنانی کارتی نیشتمانی لە پرۆسەی دەنگداندا هەڵسەنگاندنی بۆ بکرێت.

ناوبراو ئاماژەی بەوەش کرد، دوای دووبارە پڕۆگرامکردنەوەی ئامێرەکان لەلایەن کۆمپانیای پسپۆڕەوە، کۆمسیۆن لە کاتێکدا کە دواتر دیاری دەکرێت، تاقیکردنەوەی کارکردنی کارتی نیشتمانی لەسەر ئامێرەکانی ھەڵبژاردن ئەنجام دەدات.

ئەمەش دوای ئەوە دێت کە عەلى فالح زەیدى سەرۆک وەزیرانى عیراق لە 25ی ئابی ڕابردوودا، لە کۆبوونەوەیەکی هاوبەشی نێوان وەزارەتی ناوخۆ و کۆمسیۆن، ڕێنماییدابوو کە کارتی نیشتمانیی لە ھەڵبژاردنەکانی داهاتوودا بەکاربهێندرێت و جەختی لە ئامادەکردنی سەرجەم پێداویستییەکان کردبوەوە بۆ ئاسانکاریی دەنگدان.

سەبارەت بەم بابەتە، وتەبێژی کۆمسیۆن پێشتر ڕوونی کردوەتەوە: کە جێبەجێکردنی ئەم بڕیارە پێویستی بە هەموارکردنەوەی یاسای ھەڵبژاردنەکان هەیە، چونکە یاسای ھەڵبژاردنەکانی ژمارە 12ی ساڵی 2018ی هەموارکراو، جەخت لەسەر بەکارهێنانی کارتی دەنگدانی بایۆمەتری دەکاتەوە.

PUKMEDIA