ئاگربەست کۆتایی هات و ئاڵۆزییەکانی روسیا و ئۆکرانیا دەستپێکردەوە

ئاژانسەکان

ئاڵۆزییەکانی نێوان روسیا و ئۆکرانیا

وەزارەتی بەرگریی روسیا رایدەگەیەنێت: دوای کۆتایی هاتنی مۆڵەتە سێ رۆژەکەی ڤلادیمێر پوتن هێرشەکانمان بۆسەر ئۆکرانیا بە چڕی دەستپێکردەوە.

ئەمڕۆ سێشەممە 8ی9ی2026 وەزارەتی بەرگریی روسیا رایگەیاند: هێزەکانمان دەستیان بە هێرشە ئاسمانییەکانیان کردووەتەوە و چەندین دامەزراوەی پیشەسازیی بەرگریی و ناوەندی لۆجستی و دابەشکردنی کەلوپەلی سەربازییان لە کیێڤی پایتەخت و دەوروبەری کردووەتە ئامانج.

بەپێی راگەیەندراوەکە، هێرشە چڕەکانی شەوی رابردوو لە رێگەی چەکی پێشکەوتووی وشکانی و ئاسمانی و دەریایی، لەگەڵ فڕۆکەی بێفڕۆکەوانی مەودا درێژەوە ئەنجام دراون و بنکەکانی بەرهەمهێنان و کۆگاکردنی درۆن و موشەک و کەشتییەکی بارکردنی سوتەمەنی تایبەت بە سوپای ئۆکرانیایان کردوەتەوە ئامانج.

ئەمەش لەکاتێکدایە، دەستپێکردنەوەی ئاڵۆزییەکان دوای کۆتاییهاتنی ئەو ئاگربەستە سێ رۆژەییە دێت، کە پێشتر ڤلادیمێر پوتن سەرۆکی روسیا بۆ کیێڤی پایتەختی راگەیاندبوو، کە هاوکات بوو لەگەڵ سەردانی نێردراوانی ئەمریکا بۆ ئەو شارە.

PUKMEDIA