خاوه‌ن بڕ‌وانامه‌ باڵاكان داوای دامه‌زراندن ده‌كه‌ن

تایبەت

کۆنگرەی رۆژنامەوانی خاوەن بڕوانامە باڵاکان

خاوه‌ن بڕ‌وانامه‌ باڵاكانی شاری هه‌ولێر كه‌ ژماره‌یان 729 كه‌سه‌، له‌ یاداشتنامه‌یه‌كدا داوای دامه‌زراندن ده‌كه‌ن و دوو داواكاری ده‌خه‌نه‌ به‌رده‌م حكومه‌تی هه‌رێم و ئه‌نجومه‌نی وه‌زیران و لایه‌نی په‌یوه‌ندیدار.

نوێنه‌ری خاوه‌ن بڕ‌وانامه‌ باڵاكانی شاری هه‌ولێر له‌كۆنگره‌یه‌كی رۆژنامه‌وانیدا داواكارییه‌كانیانی ئاڕ‌استه‌ی لایه‌نی به‌رپرس و په‌یوه‌ندیدار كرد و رایگه‌یاند: ئێمه‌ وه‌كو هه‌ڵگرانی بڕ‌وانامه‌ی باڵا ماسته‌ر و دكتۆرای دانه‌مه‌زراو بۆ ساڵی 2008 تاوه‌كو 2026 ئه‌م داواكارییه‌ ئاڕ‌استه‌ی لایه‌نی به‌رپرس و په‌یوه‌ندیدار ده‌كه‌ین، كه‌ ماوه‌ی چه‌ندین ساڵه‌ به‌رده‌وام هه‌وڵی دامه‌زراندن ده‌ده‌ین، به‌ڵام تائێستا هیچ ئه‌نجامێكی نه‌بووه‌ بۆیه‌ دوو داواكاری ئاڕ‌استه‌ی حكومه‌تی هه‌رێم و سه‌رۆكی ئه‌نجومه‌نی وه‌زیران و وه‌زاره‌تی خوێندنی باڵا و ئه‌نجومه‌نی راژه‌ی گشتی و وه‌زاره‌تی دارایی و به‌ڕ‌ێوه‌به‌رایه‌تی گشتی بودجه‌ی هه‌رێم و سه‌رجه‌م فراكسیۆنه‌كان و ئه‌ندامانی په‌رله‌مانی عیراق ده‌كه‌ین، كه‌ بریتین له‌مانه‌:

یه‌كه‌م/ داواكارین له‌ پرۆژه‌ یاسای بودجه‌ی ساڵی 2027 ی عیراقدا پله‌ی وه‌زیفی بۆ هه‌ڵگرانی بڕ‌وانامه‌ی ماسته‌ر له‌هه‌رێم دیاری بكرێت، كه‌ بڕ‌ی زیاتر له‌ یه‌ك ملیار دیناری پێویسته‌، یاخود به‌شێوه‌ی له‌جێگه‌دانان له‌به‌شی هه‌رێم، چونكه‌ جگه‌ له‌ هه‌رێم له‌ پارێزگاكانی تری عیراق حكومه‌تی عیراق هه‌موو ساڵێك دامه‌زراندنی بۆ هه‌ڵگرانی بڕ‌وانامه‌ی باڵا كردووه‌ و تا ساڵی 2024 به‌پێی یاسای ژماره‌ 59 ی ساڵی 2017 مافی دامه‌زراندن دراوه‌ به‌ هه‌ڵگرانی بڕ‌وانامه‌ی باڵا له‌ دامه‌زراوه‌كانی حكومه‌تدا به‌بێ جیاوازی جوگرافی و سیاسی و نه‌ته‌وه‌یی ته‌نها ئێمه‌ی لێ بێبه‌شكراوین.

دووه‌م/ له‌ ئه‌گه‌ری به‌ ئه‌نجام نه‌گه‌یشتنی داواكارییه‌كانمان و جێگیرنه‌كردنی له‌ بودجه‌ی ساڵی 2027، داوا ده‌كه‌ین له‌ سه‌رۆكی ئه‌نجومه‌نی وه‌زیران، بڕ‌یاری له‌جێگه‌ دانانمان بۆ بدات به‌شێوه‌ی گرێبه‌ست، له‌ وه‌زاره‌تی خوێندنی باڵا له‌جێگه‌ی ئه‌و هه‌زار كه‌سه‌ی، كه‌ تا ئێستا ده‌ستبه‌كارنه‌بوون به‌بێ هه‌بوونی مه‌رجی ته‌مه‌ن، چونكه‌ ئێمه‌ شایسته‌ترین چینین بۆ ئه‌و له‌جێگه‌دانانه‌.

له‌كۆتایشدا، داواتان لێده‌كه‌ین به‌ هه‌ر رێگه‌یه‌ك كه‌ به‌ شایسته‌ی ده‌زانن كار بۆ داواكارییه‌كانمان بكه‌ن.

PUKMEDIA