کارکردن لە پرۆژەی بەنداوی باوەنوور بەردەوامە

حکومەتی هەرێم

پرۆژەی بەنداوی باوەنور

کارکردن لە پرۆژەی بەنداوی باوەنوور لە ئیدارەی گەرمیان بەردەوامە؛ کە سێیەم گەورەترین بەنداوی هەرێمە بۆ بەرهەمهێنانی وزەی کارەبا و پاراستنی ئاسایشی ئاو.

ئەم پڕۆژە نیشتمانییە یەکێکە لە پرۆژە گرنگەکانی وەزارەتی کشتوکاڵ و سەرچاوەکانی ئاوی حکومەتى هەرێمى کوردستان، چەندین سوود و گرنگی هەیە لەوانە:
- کەمکردنەوەى مەترسیی بەبیابانبوون.
- بووژانەوەی کەرتی کشتوکاڵ
- زیادکردنی سامانی ماسی.
- بەرزکردنەوەی ئاستی ئاوی ژێرزەوی.
 
لە ئێستادا کارەکانی بە خێراییەکی بەرچاو بەڕێوەدەچن و بڕیارە لە ماوەى دیاریکراوی خۆیدا تەواو بکرێت و لە هەردوو سێکتەرى کشتوکاڵ و ژینگەدا سوودى لێوەر بگیرێت.

بەنداوی باوەنوور بەنداوی خاکییە, بە درێژیی 880 مەتر و بەرزیی 20 مەتر، توانای گلدانەوەی 30 ملیۆن مەتر سێجا ئاوی هەیە، بەمەش دەبێتە چوارەمین گەورە بەنداو لەسەر ئاستی هەرێمی کوردستان بۆ کۆگاکردنی ئاو. 

هەروەها وێستگەیەکی بەرهەمهێنانی کارەبا لە ڕێگەی 4 تۆرباینی جۆری (Vertical-Kaplan)  لەخۆ دەگرێت بە توانای بەرهەمهێنانى  34 مێگاوات کارەبا، کە ڕاستەوخۆ دەبەسترێتەوە بە تۆڕی نیشتمانییەوە و دەبێتە سێیەم بەنداو لە دوای دووکان و دەربەندیخان بۆ بەرهەمهێنانی کارەبا. 

هاوکات پرۆژەکە لە چەندان پێکهاتەی ئەندازیاریی گرنگ پێکدێت، لەوانە: 

- دیواری دابڕەڕی ئاو (Secant Pile Wall)، بە قووڵیی نزیکەی 45 مەتر کە ڕێگری دەکات لە دزەکردنی ئاو.

- سەرڕێژێکی گەورە (Spillway)، بە 9 دەرگا و توانای تێپەڕاندنی 10.350 مەتر سێجا ئاو لە چرکەیەکدا

- دەرچەی ژێرەوە (Bottom Outlet) بۆ کۆنترۆڵکردنی ئاو

-  ڕێڕەوی تایبەتی ماسی (Fish Pass)، بەمەبەستی پاراستنی ژینگە و سامانی ماسیی سروشتی

لە ئێستادا کارە سەرەکییەکانی ئەم پرۆژەیە بە چڕی ئەنجام دەدرێن، وەک:
 
- گۆڕینی ڕێڕەوی ئاو بە 4 دایک.

-  لێدانی زیاتر لە 250 پایەلی قووڵ بە گەورەترین ئامێرەکانی جیهان

- جێبەجێکردنی دیواری ئاسنینی شیت پایەل.

- دروستکردنی ڕێگاکان و کەمپی نیشتەجێبوون بۆ 600 کەس.

وەزارەتی کشتوکاڵ و سەرچاوەکانی ئاو بەردەوامە لە چاودێریکردنی وردی کارەکان، بە ئامانجی تەواوکردنی ئەم پڕۆژە گرنگە، بۆ ئەوەی دەیان هەزار دۆنم زەویی کشتوکاڵی ببووژێنێتەوە و ئاسایشی ئاو بۆ نەوەکانی داهاتوو مسۆگەر بکات.

PUKMEDIA