جەنگی نێوان سعودیە و حوسییەکان دەستیپێکردەوە

الغد

حوسییەکان

ئاڵۆزی و جەنگی نێوان سعودیە و حوسییەکانی یەمەن  بەردەوامی هەیە و  فڕۆکە جەنگییەکانی سعودیە زیاتر لە 450 هێرشی ئاسمانییان بۆ سەر پارێزگا جیاوازەکانی یەمەن ئەنجامداوە و حوسییەکانیش رایدەگەیەنن  توانیویانە فڕۆکەیەکی جەنگیی سعودی لە جۆری F-15 لە ئاسمانی پارێزگای مەئرەب بخەنە خوارەوە، هاوکات فڕۆکەیەکی بێفڕۆکەوانی حوسییەکان لە باشووری شاری مەککە خرایە خوارەوە.

عەمید یەحیى سەریع، وتەبێژی سەربازیی حوسییەکان لە راگەیەندراوێکدا، ئاماژەی بەوەکرد: هێزەکانیان توانیویانە فڕۆکەیەکی جەنگیی سعودی لە جۆری F-15 لە ئاسمانی پارێزگای مەئرەب بخەنەخوارەوە.
وتیشی: هێزەکانیان روبەڕووی دوو فڕۆکەی دیکەی سعودیە لە جۆرەکانی "F-15" و "تایفۆن" بوونەتەوە کە لە هەوڵی دۆزینەوەی پاشماوەی ئەو فرۆکەیەدا بوون کە خراوەتە خوارەوە.
سەبارەت بە هەڵمەتە ئاسمانییەکانی ئەم هەفتەیە، وتەبێژی سەربازیی حوسییەکان ئاماژەی بەوەکردوە، فڕۆکە جەنگییەکانی سعودیە لە بنکەکانی خەمیس مشێتی و طائفەوە زیاتر لە 450 هێرشی ئاسمانییان بۆ سەر پارێزگا جیاوازەکانی یەمەن ئەنجامداوە، کە بەهۆیەوە چەندین کوژراو و برینداری لێکەوتووەتەوە.

پەیوەست بە هێرشی حوسییەکانیش بۆ سەر سعودیە، لوا روکن- تورکی مالیکی وتەبێژی هاوپەیمانی پاڵپشتی شەرعی لە یەمەن رایگەیاند: نزیکەی سەعات 18:50 دەقیقەی شەوی رابردوو، هێزی بەرگری ئاسمانی سعودیە، فڕۆکەیەکی بێفڕۆکەوانی حوسییەکانیان لە باشوری شاری مەککەی پیرۆز تێکشکاندووە.

PUKMEDIA