ئەمڕۆ فەرمانبەرانی پێنج وەزارەت و دەزگا مووچە وەردەگرن

میدیاکان

دابەشکردنی مووچە

ئەمڕۆ 16ی9ی2026، دابەشکردنی مووچە بۆ رۆژی دووەم  لە هەرێمی کوردستان،بەردەوامی هەیە و فەرمانبەرانی پێنج وەزارەت و دەزگا مووچە وەردەگرن، هەروەها لە ماوەی دوو رۆژی داهاتوودا دابەشکردنی مووچە کۆتایی دێت.

وەزارەتی دارایی و ئابوری هەرێمی کوردستان، رۆژی 14ی9ی2026، خشتەی دابەشکردنی مووچەی مانگی هەشتی فەرمانبەرانی بڵاوکردەوە، کەبەپێی خشتەکە دابەشکردنی مووچە لە رۆژی 15ی9ی2026 دەستپێدەکات و رۆژی19ی9ی2026 کۆتایی دێت.

دابەشکردنی مووچەی فەرمانبەرانی هەرێم، دوای ئەوە هات کە رۆژی 14ی9ی2026، وەزارەتی دارایی حکومەتی فیدڕاڵی بڕی 831 ملیارو 666 ملیۆن دیناری وەك تەمویلی مووچەی مانگی ئابی فەرمانبەران و مووچەخۆرانی هەرێمی كوردستان خستە سەر هەژماری بانكی وەزارەتی دارایی و ئابوری هەرێم، دواتریش وەزارەتی دارایی لیستی مووچەی بڵاوکردەوە.

پەیوەست بەو وەزارەت و دەزگایانەی کە ئەمڕۆ16ی9ی2026 مووچە وەردەگرن، ئەوە بەپێی خشتەی وەزارەتی دارایی، هەریەک لە فەرمانبەرانی زیندانییە سیاسییەکان، بەرکەوتووانی چەکی کیمایی، کەسو کاری شەهیدان و ئەنفالکراوان،وەزارەتەکانی خوێندنی باڵا، تەندروستی و پەروەردە، مووچە وەردەگرن.

ئەمەش لەکاتێکدایە، رۆژی 18ی8ی2026، وەزارەتی دارایی و ئابوری حكومەتی هەرێمی كوردستان دابەشکردنی مووچەی مانگی تەممووزى دەستپێكرد و لەماوەی سێ رۆژدا سەرجەم وەزارەتەکان مووچەکانیان وەرگرت.

PUKMEDIA