مووچەی وەزارەتی تەندروستی دابەشنەکرا

PUKMEDIA

دراوی عیراقی

هەرچەندە بەپێی ئەو خشتەیەی وەزارەتی دارایی رایگەیاندبوو، بڕیاربوو ئەمرۆ فەرمانبەرانی وەزارەتی تەندروستی لەگەڵ چەند دەستەیەکی دیکە مووچەی مانگی ئاب وەربگرن، بەڵام مووچەکە نەخرایە سەر هەژمارەکانیان.

وەزارەتی دارایی رۆژی دووشەممە 14ی9ی2026 خشتەی مووچەی مانگی ئابی بڵاوکردەوە و بەپێی لیستەکە ئەمڕۆ چوارشەممە 16ی9ی2026 پێویستبوو (زیندانییە سیاسییەکان، بەرکەوتووانی چەکی کیمیایی، کەسوکاری شەهیدان و ئەنفالکراوان، مامۆستایان و فەرمانبەرانی وەزارەتی خوێندنی باڵا و وەزارەتی پەروەردە، فەرمانبەرانی وەزارەتی تەندروستی) مووچە وەربگرن، بەڵام ئەمڕۆ مووچەخۆرانی وەزارەتی تەندروستی هیچ بڕە پارەیەک نەخرایە سەر هەژمارەکەیان و مووچەیان پێنەدرا.

لەبارەی دابەشنەکردنی مووچەی فەرمانبەرانی وەزارەتی تەندروستی، PUKMEDIA چەند جارێک پەیوەندیکرد بە سامان شێخ لەتیف وتەبێژی تەندروستی سلێمانییەوە، بەڵام وەڵامی نەدایەوە.

ئەمەش لەکاتێکدایە، چەناڵی وەتس ئەپی (هەژماری من) لیستی ئەو وەزارەت و دەستانەی ئەمڕۆ مووچە وەردەگرن بڵاوکردووەتەوە، بەڵام وەزارەتی تەندروستی تێدا نەبووە، لەوبارەیەشەوە فەرمانبەرێکی وەزارەتی تەندروستی بە PUKMEDIA ی راگەیاند: بەشیکی زۆری مووچەخۆرانی وەزارەتی تەندروستی سلێمانی لەبەیانییەوە چەند جارێک سەردانی ATMەکانمان کردووە بۆ وەرگرتنی مووچەکانمان بەڵام هیچ بڕە پارەیەک نەخراوەتە سەر هەژمارەکانمان.

ئەو فەرمانبەرە وتیشی: بەڕەسمی هیچ هۆکارێکمان لەبارەی وەرگرتنی مووچە لەئەمڕۆدا پێنەگەیشتووە، لەکاتێکدا بەپێی خشتەکەی وەزارەتی دارایی دەبوو ئەمڕۆ مووچە وەربگرین.

PUKMEDIA