پەرلەمانتارێکی یەکێتی: سەرۆککۆمار پشتیوانی لە بەهەمیشەییکردنی گرێبەستەکان دەکات

تایبەت

پەرلەمانتارانی یەکێتی و نوێنەرانی مامۆستایانی گرێبەست لەگەڵ سەرۆککۆمار

ئەمڕۆ21ی9ی2026، بەشێک لە پەرلەمانتارانی یەکێتی لە ئەنجومەنی نوێنەرانی عیراق و نوێنەرانی مامۆستایانی گرێبەست، سەردانی سەرۆککۆماریان کرد و پەرلەمانتارێکی یەکێتیش رایدەگەیەنێت: مەبەستی سەردانەکەمان بۆ  بەدەستهێنانی پشتیوانیی فەخامەتی سەرۆککۆمار بوو بۆ هەمیشەییکردن و دامەزراندنی سەرجەم گرێبەستەکان.

د. بڕیار ڕەشید ئەندامی ئەنجومەنی نوێنەرانی عیراق، لە لێدوانێکیدا بۆ PUKMEDIA، رایگەیاند: بە مەبەستی بەدەستهێنانی پشتیوانیی فەخامەتی سەرۆککۆماری عیراق، هەنگاوێکی نوێمان نا بۆ بەدیهێنانی مافی سەرجەم گرێبەستەکانی هەرێمی کوردستان، بەبێ هیچ جیاوازییەک.

‌‎وتیشی: ئەمڕۆ، لەگەڵ هاوکارم پەرلەمانتار براکۆ شێرکۆ فاتیح و نوێنەرانی مامۆستایانی گرێبەست، لە کۆشکی سەلام لەگەڵ بەڕێز نزار ئامێدی فەخامەتی سەرۆککۆماری عیراقی فیدڕاڵ، کۆبووینەوە.

‌‎پەرلەمانتارەکەی یەکێتی زیاتر لەسەر مەبەبەستی سەردانەکەیان دوا و ئاماژەی بەوەکرد: مەبەستی سەردانەکەمان، بەدەستهێنانی پشتیوانیی فەخامەتی سەرۆککۆمار بوو بۆ هەمیشەییکردن و دامەزراندنی سەرجەم گرێبەستەکان؛ چ ئەوانەی مووچەیان لەسەر داهاتی ناوخۆیە و چ ئەوانەی لەلایەن حکومەتی فیدڕاڵەوە مووچە وەردەگرن، ئەم داواکارییەمان لە چوارچێوەی بودجەی نوێی وڵاتدا خستەڕوو.

لە بارەی بۆچوونی سەرۆککۆماریش، د. بڕیار رەشید، رایگەیاند: فەخامەتی سەرۆککۆمار دووپاتی کردەوە کە سەبارەت بە بودجە و پشکی پارێزگاکانی عیراق بە گشتی و ماف و داواکارییەکانی هاووڵاتیانی هەرێمی کوردستان بە تایبەتی، بەردەوام لە پەیوەندی و هەماهەنگیدایە لەگەڵ سەرجەم لایەنە پەیوەندیدارەکان.

‌‎روونیشی کردەوە: جەنابیان لە سەرەتای دەستبەکاربوونیانەوە تاکو ئەمڕۆ، بەردەوام پێگە و پەیوەندییەکانی خۆیان بۆ چارەسەرکردنی ئەو گرفت و قەیرانانە بەکارهێناوە کە عیراق و هەرێمی کوردستان ڕووبەڕوویان دەبنەوە، هەروەها، ڕۆڵێکی گرنگیان لە نزیککردنەوەی لایەنە سیاسییەکان بە گشتی و لایەنە کوردییەکان بە تایبەتی هەبووە، ئەم نزیکبوونەوەی فراکسیۆنە کوردییەکان لە بەغدا وا دەکات زیاتر بە یەک ئاراستە کار بکەین و لە هەوڵەکانمان بۆ بەدیهێنانی داواکارییەکانی هاوڵاتیان سەرکەوتوو بین.

PUKMEDIA