کارنامەی دانیشتنی ئەمڕۆی پەرلەمانی عیراق لە چوار تەوەر پێکهاتووە

راگەیاندنى ئەنجومەنی نوێنەرانی عیراق

وێنەى دانیشتنێکى رابردووى ئەنجومەنەکە

بڕیارە ئەمڕۆ ئەنجومەنی نوێنەرانی عیراق بۆ تاوتوێکردنی چوار پرس دانیشتنی ئاسایی خۆی ئەنجام بدات، کە پرۆژە یاساکانی پێدانی مۆڵەتی درێژخایەن و هۆکارەکانی پیسبوونی ئاوی رووباری دیجلە و پڕۆژە یاسای مافی خاوەندارێتیی هزرییە.

بەپێى ئەو کارنامەی ئەنجومەنی نوێنەرانی عیراق بۆ دانیشتنەکە بڵاویکردوەتەوە، بڕیارە ئەمڕۆ چوار شەممە 23ی9ی2026، سەعات 1:00 ی پاشنیوەڕۆ دانیشتنەکە بەڕێوەبچێت و چوار تەوەر گفتوگۆیان لەسەر دەکرێت، لەوانە (خوێندنەوەی یەکەم بۆ پرۆژەی یاسای سەندیکای تاقیگەکارانی عیراقی کە لەلایەن لیژنەکانی کار و ڕێکخراوەکانی کۆمەڵی مەدەنی، خزمەتگوزاریی گشتیی فیدراڵی، رۆشنبیری و گەشتوگوزار و لاوان و وەرزش، لەگەڵ لیژنەی یاسایی) ئامادەکراوە.

هاوکات، لە تەوەری دووەمدا، خوێندنەوەی دووەم بۆ پرۆژە یاسای پێدانی مۆڵەتی ئاسایی درێژخایەن بە فەرمانبەران لەلایەن هەردوو لیژنەی یاسایی و داراییەوە دەکرێت، ئەمە جگە لەوەی لە تەوەری سێیەمدا، راپۆرتی لیژنەی فەرمانی پەرلەمانیی ژمارە (63)ی ساڵی 2026 تایبەت بە لێکۆڵینەوە لە هۆکارەکانی پیسبوونی ئاوی رووباری دیجلە و دەستنیشانکردنی لایەنە کەمتەرخەمەکان و رێکارەکانی پێویست بۆ کەمکردنەوەی کاریگەرییەکانی.

لە دواین تەوەریشدا، خوێندنەوەی یەکەم بۆ پڕۆژەیاسای مافی خاوەندارێتیی هزری تەواو دەکرێت، کە 106 ماددەی لێماوەتەوە، لەلایەن لیژنەکانی خوێندنی باڵا و یاساییەوە.

PUKMEDIA