فڕۆكەخانەی نەجەف سەرجەم گەشتەكانی لەگەڵ ئێران راگرت

فڕۆکەخانەی نەجەف

راگەیاندنی فڕؤکەخانەی نەجەف

لەدوای فڕۆكەخانەی بەغداد، فڕۆكەخانەی نێودەوڵەتیی نەجەف سەرجەم گەشتەكانی لەگەڵ ئێران راگرت، هاوکات گەشتەکان لە هەریەک لە فڕۆکەخانەی نێودەوڵەتی هەولێر و فڕۆکەخانەی نێودەوڵەتی جەلال تاڵەبانیش راگیران. 

ئیدارەی فڕۆكەخانەی نێودەوڵەتیی نەجەف بڕیاریدا بەڕاگرتنی سەرجەم گەشتە ئاسمانییەكانی بۆ ئێران،  بریارەكەش لە سەعات 2:00 بەرەبەیانی ئەمڕۆوە چووەتەوە بواری جێبەجێ كردنەوە، ئیدارەی فڕۆكەخانەكەش رایگەیاندوە، بەپێی رێنماییە رەسمییەكانی لایەنە پەیوەندیدارەكان، بریارەكە تا كاتێكی نادیار بەردەوام دەبێت. 

ئیدارەی فڕۆكەخانەكە داواشی لە كۆمپانیاكانی فڕۆكەوانی و لایەنە پەیوەندیدارەكان كردووە هیچ رێكارێك سەبارەت بەو گەشتانەی راگرتنەكە دەیانگرێتەوە نەگرنەبەر.

لەلایەکی ترەوە، بەپێی خشتەی گەشتەکانی فڕۆکەخانەی نێودەوڵەتی هەولێر و فڕۆکەخانەی جەلال تاڵەبانی، گەشتەکانی نێوان تاران هەولێر بە پێچەوانەوە، سلێمانی تاران بە پێچەوانەوە هەڵوەشانەتەوە. 

بەپێی بەدواداچوونەکان روونبووەوە راگرتنی گەشت یان رێگەپێنەدانی ئەنجام دانی گەشت ، لە دەسەڵاتی فڕۆکەخانەکاندا نییە ، بەڵکو ئەمە بڕیارێکە لە دەسەڵاتی فڕۆکەوانی شارستانی عیراقدایە.

ئەمەش لەکاتێکدایە، پێشتر رێكخراوی فڕۆكەوانی مەدەنی ئێران رایگەیاندبوو،  فڕۆكەخانەی بەغداد پێشوازی لە گەشتی كۆمپانیا ئاسمانییەكانی ئێران ناكات و هەوڵدەدەن گەشتەكانیان بۆ عیراق لەرێی فرۆكەخانەی نەجەفەوە ئەنجام بدەن.

PUKMEDIA