ئامادەکاری بۆ گواستنەوەی 156 روفاتی ئەنفال بۆ هەرێم دەکرێت

بەڕێوەبەرایەتیی پاراستنی گۆڕە بەکۆمەڵەکان و بێسەروشوێنبووان

وێنەی یەکێک لە روفاتەکان

بەیانی ئەمڕۆ بەڕێوەبەرایەتیی پاراستنی گۆڕە بەکۆمەڵەکان و بێسەروشوێنبووان سەر بە دەزگای شەهیدان، 156 روفات لە قوربانییەکانی پرۆسەکانی ئەنفالی وەرگرت، وەک ئامادەکارییەک بۆ گواستنەوەیان بۆ هەرێمی كوردستان و ئەنجامدانی بەخاکسپاردنى کاتی بەپێی رێکار و بنەما پەسەندکراوەکان.

بەڕێوەبەرایەتییەکە لە راگەیەندراوێکدا رایگەیاند: سەرجەم روفاتەکان ژن و منداڵن و قوربانیی پرۆسەکانی ئەنفالن و لە یەکێک لە گۆڕە بەکۆمەڵەکانی بادیەی سەماوە لەلایەن تیمەکانی گەڕان و پشکنینی بەڕێوەبەرایەتییەکەوە، بە هاوکاریی تیمەکانی بەڕێوەبەرایەتیی پزیشکی دادوەری لە وەزارەتی تەندروستی، هەڵگیراونەتەوە.

روونیشی کردەوە: پرۆسەی وەرگرتن و رادەستکردنەکە بە هەماهەنگی و بەدواداچوون لەگەڵ پەروین نورى راوێژکاری نزار ئامێدى سەرۆککۆمارى عیراق بۆ کاروباری بێسەروشوێنبووان و گۆڕە بەکۆمەڵەکان و بە هاوکاریی نێوان لایەنە نیشتمانییەکان و دەزگا پەیوەندیدارەکان بە دۆسیەی بێسەروشوێنبووان و گۆڕە بەکۆمەڵەکان ئەنجامدراوە.

ئاماژەی بەوەشدا: گواستنەوەی روفاتەکان و بە خاکسپاردنیان بە شێوەى کاتى دەکەوێتە چوارچێوەی ئەو رێکارە پەیڕەوکراوانەوە تا کاتی تەواوبوونی پشکنینە زانستییەکان و شیکارییە تایبەتەکان بۆ ناسینەوەی ناسنامەی قوربانییەکان، وەک ئامادەکارییەک بۆ رادەستکردنەوەیان بە کەسوکاریان و ئەنجامدانی بە خاکسپاردنى کۆتایی.

بەڕێوەبەرایەتیی پاراستنی گۆڕە بەکۆمەڵەکان و بێسەروشوێنبووان جەختیشی کردەوە لەسەر بەردەوامیی هەوڵەکانی بۆ گەڕان و پشکنین بەدوای گۆڕە بەکۆمەڵەکاندا و ئاشکراکردنی چارەنووسی بێسەروشوێنبووان و کارکردن بۆ پاراستنی روفاتی قوربانییان و رێزگرتن لە کەرامەتیان، بە شێوازێک کە مافی خێزانەکانیان مسۆگەر بکات لە زانینی چارەنووسی منداڵەکانیان و گەڕانەوەی روفاتەکانیان و بە خاکسپاردنیان بەپێی بنەماکان.

PUKMEDIA