زیاتر لە 80 پارچە شوێنەواری دزراو لە دەرەوەی وڵات گەڕێندرانەوە عیراق

راگەیاندنى وەزارەتى داد

وێنەى بەشێک لەو پارچە شوێنەواریانەى کە گەڕێندراونەتەوە

وەزارەتی دادی فیدراڵی رایگەیاند: زیاتر لە 80 پارچە شوێنەواری دزراو و بە قاچاغ براو لە دەرەوەی عیراق گەڕێندراونەتەوە.

وەزارەتی داد لە راگەیەندراوێکدا رایگەیاند: "هەوڵە بەردەوامەکانی وەزارەتی داد، بە رێنمایی و بەدواداچوونی خالید شوانی وەزیری داد بووە و بوەتە هۆی گەڕاندنەوەی زیاتر لە 80 پارچە شوێنەوار و کاری هونەری عیراقی کە بۆ دەرەوەی وڵات بە قاچاغ برابوون، ئەمەش لە چوارچێوەی هەوڵەکانی وەزارەتدایە بۆ پاراستنی میراتی شارستانی و کەلتووری عیراق و گەڕاندنەوەی موڵکە شوێنەوارییەکانی."

وەزارەتەکە ئەوەشی خستەڕوو: "بەڕێوەبەرایەتی بەڕێوەبردنی دۆسیە دەرەکییەکان، لە رێگەی بەشی گەڕاندنەوەی شوێنەوار و پارەوە بەردەوامە لە بەدواداچوون و بەڕێوەبردنی دۆسیەکان و داواکارییەکانی تایبەت بە گەڕاندنەوەی شوێنەوارەکان و کارکردن بۆ گرتنەبەری رێوشوێنی یاسایی پێویست بۆ گەڕاندنەوەی پارچە شوێنەوارییەکان، ئەو پارچانەی کە دزراون و لە دەرەوەی عیراق مامەڵەیان پێوەدەکرێت بە هەماهەنگی لەگەڵ وەزارەتی دەرەوە و باڵیۆزخانەی عیراق لە واشنتۆن و لایەنە پەیوەندیدارەکان کاریان لەسەر دەکرێت."

PUKMEDIA