گەشتە ئاسمانییەکانی نێوان عیراق و ئێران دەستپێدەکاتەوە

واع

فڕۆکەیەکی هێڵی ئاسمانی عیراقی

 باڵیۆزی عیراق لە ئێران دەستپێکردنەوەی گەشتە ئاسمانییەکانی نێوان هەردوو وڵات رادەگەیەنێت، بەڵام گەشتەکان تەنها لەرێگەی هێڵی ئاسمانی عیراقی دەبێت و کۆمپانیا فڕۆکەوانییەکانیش تەواوی خزمەتگوزارییە فڕۆکەوانییەکانیان راگرتووە.

یاسر عەبدولزەهرا حەجاج، باڵیۆزی عیراق لە کۆماری ئیسلامی ئێران، رایگەیاند: بە هەوڵی عەلی زەیدی فڕۆکەخانەی نەجەف بە رووی گەشتەکانی ئێراندا کراوەتەوە.
دەشڵێت: حکومەتی عیراق هیچ بڕیارێکی بۆ وەستانی گەشتەکان دەرنەکردووە، بەڵکو کۆمپانیا فڕۆکەوانییەکان، خزمەتگوزاری زەمینیان راگرتووە، بۆ ئەوەی رووبەڕووی سزاکان نەبنەوە.

لەلایەکی دیکەوە، دەستپێکردنەوەی گەشتەکان، فڕۆکە ئێرانییەکان ناگرێتەوە و قەدەغەکردنی فڕینیان بۆ ئاسمانی عیراق بەردەوام دەبێت، لە کاتێکدا تەنیا ڕێگە بە هێڵی ئاسمانیی عیراقی دراوە سەرنشینان لە نێوان هەردوو وڵاتدا بگوازێتەوە.

ئەمەش لەکاتێکدایە، ڕۆژی هەینی ڕابردوو، حکومەتی عیراق وەک پابەندبوونێک بەو سزایانەی واشنتن بەسەر زیاتر لە 36 لایەنی کەرتی فڕۆکەوانیی ئێراندا سەپاندبووی، سەرجەم گەشتەکانی لەگەڵ ئەو وڵاتە هەڵپەسارد، هەوڵە دیپلۆماسییەکانی بەغدادیش دوای ئەوە هات تا لە ڕێگەی لێخۆشبوونێکی کاتییەوە، ڕێگری لە پەککەوتنی هاتووچۆی زیارەتکارانی مەزارگە ئایینییەکان لە ڕێگەی فڕۆکەی عیراقییەوە بکرێت.

PUKMEDIA