وتەبێژی وەزارەتی بەرگریی: لەمڕۆوە هیچ ئەندامێكی هاوپەیمانی نێودەوڵەتی لەعیراقدا نامێنێت

ميدياكان

لیوا یەحیا رەسوڵ، وتەبێژی وەزارەتی بەرگریی عیراق

وتەبێژی وەزارەتی بەرگریی عیراق رایدەگەیەنێت: لە ئەمڕۆوە هیچ ئەندامێك یان سەربازێكی هاوپەیمانی نێودەوڵەتی لە ناو خاكی عیراقدا نەماوەو هەواڵگریی عیراق-یش گەشەسەندنی گەورەی بەخۆیەوە بینیوە.

لیوا یەحیا رەسوڵ، وتەبێژی وەزارەتی بەرگریی عیراق، رایگەیاند: لە ئەمڕۆ 30ی ئەیلوولەوە هیچ ئەندامێك یان سەربازێكی هاوپەیمانی نێودەوڵەتی لە ناو خاكی عیراقدا نەماوەو كشانەوەیان بەرهەمی هەوڵێكی گەورەی عیراق بووە.

ئاماژەی بەوەشكرد: هێزە ئەمنییەكان و هەواڵگریی عیراق گەشەسەندنی گەورەیان بەخۆیانەوە بینیوە، لەوانەش رۆڵی سەرەكییان لە كوشتنی ئەبوبەكر بەغدادی و پاراستنی سنوورەكان بە ئامێری پێشكەوتوو هەبووە.
 
جەختیشی كردەوە: كە بنكەی سەربازیی ڤیكتۆریا، بە تەواوی لەلایەن سوپای عیراقەوە بۆ پاراستنی ئاسمان و خاكی وڵات بەكاردەهێنرێت و هیچ فڕۆكەیەكی هاوپەیمانانی تێدا نەماوە.

جێی ئاماژەیە، لە چەند رۆژی رابردوودا هێزەكانی هاوپەیمانان بنكەو بارەگا رەسمییەكانیان لە هەولێری پایتەختی هەرێمی كوردستان جێهێشت و ئەمەش لەچوارچێوەی كشانەوەی هێزەكانی هاوپەیمانانە لە عیراق.

PUKMEDIA