هۆکارى بەرزبوونەوەى نرخى دۆلار ئاشکرا دەکرێت

PUKMEDIA

دینار و دۆلار

بەراورد بە چەند رۆژى رابردوو نرخى دۆلار بەرامبەر دینار بەرزبوونەوەى بەخۆیەوە بینى و خاوەنى نوسینگەیەکى دراویش دەڵێت: هۆکارەکەى زیاتر سیاسییە و خواستیش لەسەر دۆلار زیادى کردووە.

لوقمان حەسەن خاوەنی نوسینگەیەکی ئاڵوگۆڕی دراو لە بازاڕی دراوی شاری سلێمانی بە وێبسایتی رەسمیی یەکێتیی نیشتمانیی کوردستان PUKMEDIA ی راگەیاند: لە دوو رۆژى رابردوودا نرخى 100 دۆلار نزیکەى هەزار دینار بەرزبووەوە و ئەو بەرز و نزمیانەش لە نرخى دراوەکان ئاساین، چونکە بارودۆخى سیاسى وڵات زۆر جێگیر نییە.

راشیگەیاند: زۆربوونى خواست لەسەر دۆلار و لابردنى سفرەکانى دینار دوو هۆکارى سەرەکین بۆ بەرزبوونەوەى نرخى دۆلار بەرامبەر دینار، هاوکات بارودۆخى سیاسیش کاریگەرى هەیە.

ئەوەشى خستەڕوو: بانکى مەرکەزى کە 100 دۆلارى بەرامبەر بە 132 هەزار دینار جێگیر کردووە تا رادەیەک جێگیرى بە نرخى دۆلار داوە و هەموو بەرزبوونەوەیەک یاخود نزمبوونەوەیەک بە رێژەیەکى کەم ئاساییە.

ئەمڕۆ چوار شەممە 30ى9ى2026، نرخى 100 دۆلارى ئەمریکى بەرامبەر بە 157 هەزار و 400 دینارە لە کاتێکدا لە رۆژانى رابردوو نرخەکەى بۆ نزیکەى 155 هەزار دابەزى و چاوەڕوان دەکرێت لە چەند رۆژى ئایندەدا جارێکى دیکە نرخەکەى دابەزێتەوە و بە جێگیرى بمێنێتەوە، هەرچەندە بەهۆى ئەو بارودۆخە نائارامەى لە ناوچەکەدا هەیە کاریگەرى زۆرى لەسەر نرخى تمەن کردووە و بەهاکەى لەدەستداوە، کە نرخى 100 دۆلار گەیشتوەتە 25 ملیۆن تمەن ، چاوەڕوان دەکرێت زیاتریش نرخى تمەن دابەزێت.

PUKMEDIA