رێبوار تەها: راستییەکانی رووداوەکەی پردێ-مان خستە بەردەم لیژنەی لێکۆڵینەوە

PUKMEDIA

رێبوار تەها جێگری یەکەمی پارێزگاری کەرکوک لیژنەی لێکۆڵینەوە

رێبوار تەها رایدەگەیەنێت: سەرجەم راستییەکانمان بۆ ئەو لیژنەیەی سەرۆکوەزیرانی عیراق بڕیاریدا پێکبهێنریت بۆ لێکۆڵینەوە لەڕووداوەکە، روونکردووەتەوە و هەر ئەمڕۆ ناوەڕۆکی لێکۆڵینەوەکە بە سەرۆکوەزیرانی عیراق دەگاتەوە، دەشڵێت: سەرۆکوەزیرانی عیراق بڕیاریشداوە قەرەبووی زیانە ماددی و مەعنەوییەکانی رووداوەکە بکاتەوە.

رێبوار تەها جێگری یەکەمی پارێزگاری کەرکوک سەبارەت بە رووداوەکەی چەند رۆژی رابردووی پردێ، لەکۆنگرەیەکی رۆژنامەوانیدا رایگەیاند: ئێمە ئاگاداری هاتنی ئەو هیزە نەبووین بۆ پردێ، کە بوونە هۆی دروستکردنی ئەم رووداوە و شەهیدکردنی دوو گەنجمان، هاوکات لیژنەی ئەمنی عیراق-یش دەزانێت ئەنجامدانی ئۆپراسیۆنەکە هەڵەی تێدابووە.

راشیگەیاند: لەئێستادا ئەو لیژنەیەی سەرۆکوەزیرانی عیراق بڕیاریدا پێکبهێنریت بۆ لێکۆڵینەوە لەڕووداوەکە لێرەن و لە نزیکەوە لەگەڵمان دانیشتن و سەردانی کەسوکاری شەهیدەکانیش دەکەوێت، بەڵام ناتوانن هیچ لێدوانێک بدەن تا بە تەواوی لێکۆڵینەوە دەکەن و دەیخەنەوە بەردەمی سەرۆکوەزیرانی عیراق، پاشان ناوەڕۆکی لێکۆڵینەوەکە رادەگەیەنرێت، ئێمەش وەک خۆمان راستتیەکانمان باس کرد و روونمان کردەوە کە بێ سەرەوە بەرەییەک هەبووە و دووپاتیشمانکردەوە کە شەڕی تیرۆر تەنها تەقە کردن نییە.

رێبوار تەها، ئاماژەی بەوەشکرد، پێویستە تا ئیوارەی ئەمڕۆ لیژنەکە تەواوی لێکۆڵینەوەکانیان بکەن و ناوەڕۆکەکەی بدەنەوە بە سەرۆکوەزیرانی عیراق، هاوکات لەگەڵ نوسینگەی سەرۆکوەزیرانی عیراق قسەم کرد و بڕیاریانداوە بە قەرەبووکردنەوەی کەسوکاری شەهیدەکان و ئەو زیانەی بەر دووکانەکانیش کەوتووە، بۆ ئەمەش بەڕێوەبەری ناحیەی پردێمان راسپاردووە زیانەکان بخەمڵێنێت و ئاگادارمان بکاتەوە.

PUKMEDIA