دەزگای ئاسایشی هەرێم: گۆڕانکاریی لە بازگەکانی سنوری پارێزگای سلێمانی دەکرێت

AI / PUKMEDIA

دەزگاى ئاسایشى هەرێم

دوێنی چوارشەممە 30ى9ى2026 گۆڕانکاریی لە شوێنی ژمارەیەک بازگەی سنووری ئیدارەی گەرمیان ئەنجامدرا، سەرچاوەیەکی باڵاش بە میدیاى یەکێتیى نیشتمانیى کوردستانى راگەیاند: گۆڕانکارییەکان بەپێی پلانێکی ئەمنی بووە و هەموو سنووری پارێزگای سلێمانی و هەڵەبجە و ئیدارە سەربەخۆکان دەگرێتەوە.

سەرچاوە ئەمنییە باڵاکە رایگەیاند: ئەو گۆڕانکارییانەی لە شوێنی ژمارەیەک لە بازگە ئەمنییەکانی سنوری پارێزگای سلێمانی و بە تایبەت سنوری ئیدارەی گەرمیان ئەنجامدراوە دەرەنجامی پلانێکی ئەمنی تۆکمەی دەزگای ئاسایشی هەرێمی کوردستانە.

روونى کردەوە: گۆڕانکارییەکان لەلایەن لیژنەیەکی ئەمنی پسپۆڕەوە ئەنجامدراون و تەنها ئیدارەی گەرمیان ناگرێتەوە، بەڵكو سنوری پارێزگای سلێمانی، پارێزگای هەڵەبجە و ئیدارەی راپەڕین دەگرێتەوە.
 
ئاشکراى کرد: بڕیاردراوە بازگەی عەربەت بگوازرێتەوە بۆ ئەودیو شەقامی 100 مەتری سلێمانی و بازگەی بانی مەقانیش دەبرێتە قەرەهەنجیر و گۆڕانکارییەکان بۆ پاراستنی زیاتری هەرێمی کوردستان و پاراستنی ئاسایشەکەیەتی، وتیشی: هۆکاری گۆڕانکارییەکان بۆ گۆڕانکاریی لە تۆپۆگرافیای شار و شارۆچکەکان و فراوانبوونی ژمارەیەک لە شەقامەکان دەگەڕێتەوە.

دەزگای ئاسایشی هەرێمی کوردستان جەخت دەکاتەوە، سازش لە یەک بستی خاکی هەرێمی کورستان ناکاتەوە و ئەوەی کراوە بۆ ئاسانکاری هاتووچۆی هاووڵاتیان و پاراستنی سەروماڵییانە.

PUKMEDIA