دژەتیرۆری عیراق داوای لێبوردن لە خێزانی دوو شەهیدەكەی پردێ دەكات

AI

دژەتیرۆری عیراق

دژەتیرۆری عیراق بۆ شەهیدبوونی دوو هاووڵاتی كورد لەپردێ، داوای لێبوردن لە خێزانەكانيان دەكات و دەڵێت: لیژنەی لێكۆڵینەوە پێكهێنراوە.

دژەتیرۆری عیراق رایگەیاند: لەكاتی روبەڕوبوونەوەی چەند چەكدارێكی داعـ.ـش لە پردێ، دوو هاووڵاتی شەهیدبوون، داوای لێبوردن دەكەین بۆ ئەوەی بەسەر هاووڵاتییاندا هات و پرسە و سەرەخۆشی ئاڕاستەی خێزانی شەهیدەكان دەكەین.

دژە تیرۆری عیراق ئاماژەی بەوەشكرد: لیژنەی لێكۆڵینەوەی لە شەهیدبوونی دوو گەنجەكەی كەركوك پێكهێنراوە.

ئەمەش لەكاتێكدایە، لەچەند رۆژی رابردوودا، دوو گەنجی كورد بەناوەكانی محەمەد هێمن و موراد زانا،  لە كاتی كاركردن بۆ پەیداكردنی بژێوی خێزانەكەیان و لە كاتی روبەڕوبوونەوەی نێوان هێزە ئەمنییەكان و گروپە تیرۆریستییەكاندا شەهید كران.

دوای رووداوەكەش هەریەك لە، كاروان گەزنەیی وتەبێژی یەكێتیی نیشتمانیی كوردستان، ئاسۆ مامەند سەرپەرشتیاری كەركوك-سەڵاحەدینی یەكێتیی نیشتمانیی كوردستان و فراكسیۆنی یەكێتی لە ئەنجومەنی نوێنەرانی عیراق لەبارەی رووداوە دڵتەزێن و  نەخوازراوەكەی شاری كەركوك، بەیاننامەیان بڵاوكردەوەو رایانگەیاند: لای یەكێتیی نیشتمانیی كوردستان، كەركوك شاری پێكەوە ژیانی ئاشتییانەی پێكهاتەكانە و لە رابردووشدا، لەروبەڕوبوونەوەی تیرۆر رۆڵی پێشەنگ و كاریگەریی هەبووە، بە پشتیوانی هێزەكانی هاوپەیمانان و هاوئاهەنگی تەواوی هێزە عیراقییەكان، ئێستاش ئامادەیی تەواوەتیمان هەیە لە بەرگریكردن لەكەركوك و تەواوی خاكی عیراق، بەڵام نابێت تیرۆر و خەڵكی سڤیل تێكەڵ بكرێن.

PUKMEDIA